Rama, skemë për shkarkimet në ish- bashkitë e djathta që PS mori në Veri

Paralajmërimi i PD: Nuk ia dorëzojmë zyrat krimit të organizuar

Gjykata e Shkodrës i dha kandidatit të PS- së, Valdin Pjetrit, mandatin e marrë në zgjedhjet e 30 qershorit për drejtimin e kryeqendrës së veriut. "Ne na pret punë e madhe për Shkodrën që duam, për bashkinë që duam. Do të shohim mandatet, kur të skadojë afati 4- vjeçar i kryebashkiakes aktuale, atëherë, sipas procedurave, do veprojmë edhe në për Bashkinë Shkodër", tha Pjetri menjëherë pas vendimit të Gjykatës. Por demokratët kanë paralajmëruar se nuk do t'ia lëshojnë zyrën e bashkisë një kandidati, që mori vetëm 6% të votave të qytetarëve. Në një deklaratë për mediat, ish- deputetja e PD në Shkodër, Izmira Ulqinaku, theksoi se Voltana Ademi do të vijojë të qëndrojë në zyrën e kryetarit të bashkisë. "Don Kishoti që ' triumfoi' me ' mullinjtë e erës', në votime moniste si në kohën e diktaturës komuniste, u shpall fitues i votimeve socialiste nga një gjykatës i vënë nën presion nga ethet e vetingut, që i rri mbi kokë sistemit të drejtësisë në vend. Partia Demokratike e Shkodrës është e vendosur në mbrojtjen e Kushtetutës, Dekretit të Presidentit të Republikës dhe ligjeve të këtij vendi. Asnjë vendim i asnjë institucioni, në shkelje ligjore, të lirive e të drejtave themelore të njeriut, nuk do të njihet nga banorët e Bashkisë së Shkodrës. Çdo përpjekje për t'iu imponuar shkodranëve, përmes institucioneve të kapura dhe që shkelin Kushtetutën, dekretin e Presidentit dhe ligjet e Shqipërisë, do të përballet me vendosmërinë e njohur të shkodranëve. Shkodranët nuk kanë për të pranuar kurrë që edhe Bashkinë Shkodër t'ia dorëzojnë krimit të organizuar, t'ia dorëzojnë përfaqësuesit të emëruar prej tyre", tha ish- deputetja e PD- së.