Arrestohet "çiklisti" nga Durrësi, dyshohet se vodhi 7 biçikleta
TIRANË - Shërbimet e Komisariatit nr. 3 finalizuan dje operacionin e koduar "Çiklisti", duke vënë në pranga një 28- vjeçar nga Durrësi që dyshohet të ketë vjedhur 7 biçikleta. Policia ka sekuestruar 4 prej biçikletave që ai dyshohet të ketë vjedhur, si dhe disa objekte që ai përdorte për realizimin e ngjarjeve. Policia tha se si rezultat i punës së bërë, bazuar mbi informacionet e marra në rrugë operative, për një shtetas që dyshohej se kishte kryer këto vjedhje, shërbimet e Policisë të Komisariatit nr. 3 kanë finalizuar operacionin ku kanë bërë kapjen në flagrancë të shtetasit G. B., 28 vjeç, banues në Durrës, i dënuar më parë për vjedhje. Në momentin e ndalimit në rrugën "Don Bosko", Policia i gjeti këtij shtetasi 4 biçikleta të vjedhura, si dhe sendet që përdorte për kryerjen e vjedhjeve, konkretisht: thikë, kaçavidë, çelësa të vegjël biçikletash, pinca, kapele për maskim etj. Në vijim të hetimeve, bazuar në prova të grumbulluara dhe pamje filmike, dyshohet se ky shtetas është autor edhe i 3 vjedhjeve të tjera biçikletash, të ndodhura gjatë muajve mars- prill të këtij viti në Tiranë. "Po vijon puna në bashkëpunim me komisariatet e tjera të Policisë së Tiranës për dokumentimin e vjedhjeve të tjera të biçikletave të ndodhura në kryeqytet, pasi dyshohet se ky shtetas ka kryer edhe vjedhje të tjera të biçikletave duke ua shitur personave të rastësishëm në shuma më të vogla nga vlera e tyre reale", tha dje Policia. Gjithashtu, u procedua në gjendje të lirë dhe shtetasi E. Gj., 41 vjeç, banues në Tiranë për "Përvetësim të sendeve të vjedhura".