Basha nuk heq dorë, dy zgjedhje në një datë
“Duan të imponojnë me forcë vullnetin e pakicës, s’do t’i lejojmë”
Kryetari i Partisë Demokratike, Lulzim Basha, është i bindur se nëse në Shqipëri do të ketë zgjedhje të parakohshme, forca e tij politike do të jetë shumicë qeverisëse.
Me qëndrimin e pandryshuar se zgjedhjet e parakohshme duhet të mbahen në të njëjtën ditë me ato për pushtetin vendor, Basha përsëriti kërkesën për krijimin e një qeverie tranzitore pa Edi Ramën Kryeministër. Nga Librazhdi, ku zhvilloi një takim me strukturat e demokratëve për aksionin politik të opozitës, kreu i opozitës premtoi se të gjithë ata që u përfshinë në vjedhjen e votave, duhet të shkojnë përpara drejtësisë dhe prapa hekurave. “Të gjitha të dhënat tregojnë se sot opozita e bashkuar është shumicë qeverisëse, edhe sikur zgjedhjet e lira e të ndershme të mbahen nesër. Detyrat tona nuk kanë qenë kurrë më të qarta e më akute. Pas çlirimit të vendit nga kjo monstër, duhet të veprojmë me vendosmëri dhe saktësi kirurgjikale” tha Basha.
BASHKITË Një ditë pasi kreu i ri socialist i Bashkisë së Devollit hyri në zyrë me ndihmën e Forcave të Ndërhyrjes së Shpejtë, Basha iu bashkua protestuesve të opozitës përpara bashkisë. Duke akuzuar socialistët për uzurpimin e godinave të pushtetit vendor, kryedemokrati garantoi se shumë shpejt pakica kriminale do të largohet. “Pakica kriminale 6 % ka uzurpuar aktualisht, në mënyrë hajduteske, godinën e Bashkisë së Devollit. Shpejt do ta shporrim këtë pakicë kriminale nga Devolli dhe nga e gjithë Shqipëria. Me pushtimin e bashkisë si hajdut, me pushtimin e pushtetit vendor si kriminel dhe me tentativën për t’i mbivendosur vullnetit të mbi 94% të qytetarëve të Devollit, vullnetin e kriminelëve dhe hajdutëve që mezi e nxorën 6% të votave në procesin e paligjshëm dhe antikushtetues të 30 qershorit. Shporrja me çdo kusht, me çdo mjet, me çdo formë”, tha Basha. Për kreun e opozitës, vendimi i maxhorancës për të marrë me polici bashkitë ku nuk i votuan më shumë se 10% e qytetarëve është antikushtetuese dhe dhunë kriminale. Duke shprehur keqardhje për sjelljen e Policisë, Basha garantoi se kushdo do të marrë përgjigjen e merituar. “Shpreh keqardhjen time më të thellë për keqpërdorimin e efektivëve dhe uniformës së Policisë. Nuk duhej të ishin në mbrojtje të hajdutit, duhej të ishin brenda, të arrestonin hajdutin. Hajdutët i kanë bërë llogaritë me ditët e fundit të korrikut dhe me fillimin e gushtit. Kanë kujtuar se në vapën e verës do të mund të realizojnë planin e tyre të vjedhjes. E kanë gabim. Mund të futen si hajdutë, por nuk do të qeverisin dot asnjë ditë, si hajdutët që janë. Sot e ditë përditë, në Devoll, në Kavajë, në Pogradec, në Shkodër, në Kamzë e në të gjithë Shqipërinë, hajdutët e pushtetit vendor, që dhunshëm e përdhunshëm duan të imponojnë vullnetin e pakicës kriminale 6 % vullnetit të shumicës shqiptare, do të përballen me vendosmërinë tonë. Rrëzimi i këtij regjimi hajdutësh është gjëja më e sigurt që mund të themi sot me gojën plot”, garantoi kreu i PD- së.