“I keqardhur për Presidentin, i gatshëm ta ndihmoj”

Rama: Tërmetin e ka të thjeshtë, nxjerr një dekret dhe e shtyn

Por çfarë jeni i gatshëm të diskutoni? Për Reformën Zgjedhore, që është me shumë rëndësi që të adresohet sipas rekomandimeve të bëra nga OSBE- ODHIR- i dhe sipas porosive të lëna nga Këshilli Europian dhe që është një bazë shumë e rëndësishme për lojën. Pra, palët negociojnë rregullat e lojës, palët nuk vendosin rezultatin e lojës. Kjo është shumë e thjeshtë. Rezultatin e vendos loja. Palët, përpara se të hyjnë në lojë, negociojnë dhe dakordësojnë rregullat, nëse duan rregulla të reja, ose u nënshtrohen rregullave ekzistuese. Ka mbaruar historia e shpikjeve dhe historia e karameleve. Karamele më nuk ka. “Qofte te daja” më nuk ka, sepse “daja” ka vdekur në 30 qershor për të gjitha partitë politike shqiptare. Kush është parti politike dhe do të fitojë çfarëdo qoftë, duhet të hyjë në lojë dhe ta fitojë. Kush fiton dhe kush humbet, e vendos vetëm populli, askush tjetër. Me zotin Meta jeni takuar pas 30 qershorit? Jo, faleminderit. Keni deklaruar se jeni të gatshëm të uleni në tryezë me opozitën, por a është në planet tuaja që të rregulloni marrëdhëniet me Presidentin Ilir Meta?

Jo, nuk e kam në plan, por jam i gatshëm ta ndihmoj Presidentin në rast se ma kërkon, sepse sinqerisht jam shumë i keqardhur për Presidentin dhe jam shumë i keqardhur për gjendjen e institucionit. Por si shenjë e parë jam kursyer dhe do të vazhdoj të kursehem, sepse realisht situata e Presidentit është e rëndë dhe nuk dua t’i shtoj më shumë vështirësi në perceptimin e realitetit.

Mund të fillojë rregullimi i marrëdhënieve me zotin Meta, duke i kthyer një përgjigje për shqetësimin e tij për tërmetin?

Tërmetin ai e ka shumë të thjeshtë, nxjerr një dekret dhe e shtyn.