“Korrupsion i madh”, Vangjush Dako e familja, ‘ non grata’ në SHBA
“Është e rëndësishme për qeverinë shqiptare të dijë se SHBA- të e marrin seriozisht përfshirjen e z. Dako në akte korruptive”
Departamenti Amerikan i Shtetit shpalli dje ‘ non- grata’ ish- kryetarin e Bashkisë së Durrësit, Vangjush Dako, dhe familjen e tij.
Sipas njoftimit, ky vendim i Departamentit Amerikan të Shtetit u mor, pasi ka dyshime të forta për ushtrimin e korrupsionit nga ana e ish- kryebashkiakut të Durrësit.
VENDIMI Vendimi për të shpallur ‘ non- grata’ Vangjush Dakon erdhi pasi Departamenti Amerikan i Shtetit kishte dyshime të forta se ai ka ushtruar korrupsion aktiv dhe pasiv gjatë mandatit të tij si kryebashkiak. Në një përgjigje për “RTV ORA”, DASH dha argumentimin e tij mbi këtë vendimmarrje, ku theksoi se: “Departamenti i Shtetit i SHBA- ve ka një informacion të besueshëm se z. Dako ka qenë i përfshirë në korrupsion të rëndësishëm gjatë mandatit të tij si kryetar i Bashkisë së Durrësit. Në lidhje me këtë rast specifik, ne besojmë që është e rëndësishme për qeverinë shqiptare dhe popullin shqiptar të dijë se SHBA- të e marrin seriozisht korrupsionin dhe përfshirjen e z. Dako në akte korruptive. Kjo tregon një nga shumë mjetet që SHBA përdor për të adresuar globalisht korrupsionin. Korrupsioni shkakton kosto mbi ekonominë, shoqërinë dhe sigurinë; mund të lehtësojë krimin e organizuar dhe të heqë besimin në sundimin e ligjit dhe qeverisjen. Kjo ndikon drejtpërdrejt në interesat e sigurisë kombëtare, ekonomike dhe të politikës së jashtme amerikane dhe besojmë edhe në ato të Shqipërisë”.
FUNKSIONET Pas publikimit të lajmit që Vangjush Dakos iu mohua viza, vetë kryebashkiaku i Durrësit bëri komentin paraprak në media. Në një prononcim për televizionin “News 24” m ai theksoi se nuk ishte në dijeni të një vendimmarrjeje të tillë nga ana e Departamentit Amerikan të Shtetit. “Nuk kam asnjë koment. Nuk di asgjë për vendimin”, është shprehur shkurtimisht ish- kreu i Bashkisë së Durrësit. Ky vendim i Departamentit Amerikan të Shtetit erdhi në momentin kur në bashkinë bregdetare pritet të bëhet rrotacioni nga Vangjush Dako te Valbona Sako, që të dy nga e njëjta parti politike. Dako, ndonëse nuk ka një mandat të ri për të drejtuar qytetin bregdetar, ai sërish është një nga funksionarët më të lartë politikë të Partisë Socialiste. Konkretisht, ai është anëtar i Kryesisë së Partisë Socialiste, anëtar i Asamblesë së Partisë Socialiste, si edhe drejtues politik i kësaj force për Qarkun e Durrësit, që është zona e tretë më e madhe elektorale në vend dhe prodhon 14 mandate deputetësh.
PËRGJIMET Departamenti Amerikan i Shtetit theksoi se refuzimi për të hyrë në ShBA për Dakon dhe familjen e tij erdhi për shkak të dyshimeve për korrupsion gjatë ushtrimit të mandatit. Por ishkryebashkiaku i Durrësit ka dalë në përgjimet e dosjes hetimore “339”. Disa muaj më parë, “Zëri i Amerikës” ka nxjerrë në pah rastin e hetimeve të Prokurorisë për kryetarin e Bashkisë së Durrësit, Vangjush Dako, i cili rezulton të ketë mbajtur kontakte me anëtarët e një grupi të krimit të organizuar, i njohur si grupi i “Avdylajve”, që dyshohet të jetë përfshirë në blerje votash në ndihmë të zotit Dako gjatë zgjedhjeve parlamentare të 2017s. Bisedat e përgjuara telefonike, sipas dosjes së Prokurorisë, tregojnë gjithashtu një marrëdhënie të shtrirë në kohë mes Dakos dhe vëllezërve Avdylaj, kontributi i të cilëve në zgjedhje duket se është shpërblyer me qasje pranë disa institucioneve kyçe në Durrës. Por këto akuza të publikuara në “Zërin e Amerikës”, Dako i ka refuzuar duke theksuar se si funksionar politik mban kontakte me të gjithë elektoratin, madje kujtohet edhe shprehja e tij se i ka duart “akullore”.