Kompensimi i pronave, ATP nis ndarjen e fondit fizik
Ndahen 25 milionë lekë dhe 56 hektarë tokë bujqësore
Edhe pse ishte thënë që përparësi do të kishte ndarja e fondit fizik, 6- mujori i parë i këtij viti u mbyll me bilanc zero.
Vendimi i shumëpritur erdhi dje ku njësoj si vitin e kaluar, ka vetëm një pakicë përfituesish. "ATP njofton se aktualisht ka përfunduar shqyrtimin e 11 aplikimeve, me objekt kompensimin financiar dhe kompensimin fizik nga fondi i tokës në dispozicion të ATP- së, për pronën e njohur me vendimet e ishKKKP- ve. Nga aplikimet e shqyrtuara deri tani, rezulton se: 10 aplikime, vendimet e të cilave përfitojnë kompensim financiar dhe fizik nga fondi i tokës në dispozicion të ATPsë dhe për 1 aplikim, është vendosur përfundimi i procedimit administrativ", thuhet në njoftimin e Agjencisë. Fondi financiar i vënë në dispozicion për këto familje, që me formulën e re u takon të marrin vetëm 20 për qind të vlerës së pronës në lekë, është 25 milionë lekë. Pjesa e mbetur mbulohet nga fondi fizik që ATP disponon. "Vlera e fondit financiar të shpërndarë është 25 225 602,8 lekë. Ndërsa sipërfaqja e kompensuar fizikisht nga fondi i tokës është 563 364.3 m2, ( 56.3 ha). Gjithashtu, njoftojmë se të gjithë subjektet, të cilët kanë aplikuar apo do të aplikojnë për ekzekutimin e vendimeve përfundimtare të vlerësuara financiarisht, do të trajtohen me kompensim vetëm pasi të ketë përfunduar shqyrtimi administrativ i kërkesës dhe gjithë dokumentacionit të depozituar nga ana e tyre".
APLIKIMI
Në njoftimin për mediat, Agjencia e Pronave ka ripërsëritur thirrjen për aplikime. "Sqarojmë se procesi i aplikimit dhe ekzekutimit të vendimeve përfundimtare të vlerësuara financiarisht për vitet 1993- 2013 është një proces i vazhdueshëm dhe i hapur për të gjithë subjektet. ATP fton të gjithë subjektet e vendimeve përfundimtare të vlerësuara financiarisht, që të paraqiten pranë zyrave të saj, për të aplikuar duke plotësuar dhe depozituar dokumentacionin përkatës". Për procesin e aplikimit nga pronarët kërkohet konfirmimi nga ZVRPP- ja përkatëse mbi gjendjen juridike të pronës që kompensohet dhe nëse është ushtruar apo jo e drejta e parablerjes, dëshmi trashëgimie nëse ka ndryshuar rrethi i trashëgimtarëve, prokurë, numër llogarie dhe dokument identifikimi. Me ndryshimet e bëra nuk do të jetë më e nevojshme që pronarët të shkojnë në Gjykatë apo në njësinë administrative, në të cilën kanë banuar deri në vitin 1991. Kjo gjë shmanget, pasi për të vërtetuar nëse një vendim është ankimuar apo jo në rrugë gjyqësore, nuk nevojitet shkresë zyrtare, mjafton vetëm një deklaratë noteriale, e cila do të ketë të njëjtin funksion. Nga ana tjetër, as për faktin nëse është përfituar nga ndarja e tokës në 1991 nuk duhet më vërtetim, por vetëm deklaratë noteriale, në të cilën pronari apo përfaqësuesi me prokurë vetëdeklaron nëse ka përfituar nga ndarja e tokës me ligjin 7501.
SKEMAT
Përveç kompensimit në pronën e njohur, pronarët mund të zgjedhin pjesëmarrjen në ankand, kompensimin nga fondi i tokës që ATP disponon, kompensim financiar e fizik njëherazi apo pagesën me këste përgjatë 10 viteve. Këto janë 5 skemat që do të aplikohen nga ATP për të kompensuar 18 mijë vendime të formës së prerë. Me përparësi do shihet kompensimi në pronën e njohur. Pra, për çdo familje të shpronësuar, do të shikohet fillimisht mundësia që t'i kthehet një pjesë e tokës që i është konfiskuar. Nëse kjo nuk do të jetë e mundur, atëherë pronarëve u lind e drejta të kompensohen financiarisht duke marrë vetëm 20% të vlerës. Për pjesën e mbetur do të kompensohen nga fondi i tokës.