Lul Caka u lirua 4 muaj e 22 ditë para kohe, arrestohet drejtori i Burgut
Në pranga edhe kartelisti i Burgut të Lushnjës, përllogariti gabim shlyerjen e plotë të dënimit për të "tmerrshmin" e Beratit
Sipas ministres së Drejtësisë, Etilda Gjonaj, Lulzim Caka, që ishte i dënuar me 25 vjet heqje lirie, është liruar 4 muaj e 22 ditë para se t'i përfundonte plotësisht dënimi. Në një deklaratë për shtyp, Gjonaj tha se është informuar mbrëmjen e së hënës nga Shërbimi i Kontrollit të Brendshëm të Burgjeve për lirimin para kohe të Cakës dhe ka urdhëruar menjëherë verifikimin e hetimin e çështjes. Menjëherë është ngritur një grup i përbashkët hetimi nga Drejtoria e Përgjithshme e Burgjeve, Shërbimi i Kontrollit të Brendshëm të Burgjeve dhe stafi i Ministrisë së Drejtësisë. Sipas Gjonajt, nga verifikimet ka rezultuar se shtetasi Lulzim Caka është liruar nga IEVPLushnjë 4 muaj e 22 ditë përpara shlyerjes së plotë të dënimit, për shkak të përllogaritjes në mënyrë të gabuar nga ana e kartelistit të IEVP Lushnjë dhe lëshimit të urdhrit të lirimit në mënyrë të kundërligjshme nga Drejtori i IEVP Lushnjë.
HETIMI DHE ARRESTIMET
"Dje ( të hënën) në mbrëmje, me informacion në rrugë operative nga Shërbimi i kontrollit të Brendshëm të burgjeve, jam vënë në dijeni me dyshimin e lirimit para kohe nga IEVP Lushnjë, të të dënuarit Lulzim Caka, i dënuar me 25 vjet heqje lirie për kryerjen e disa veprave penale. Menjëherë sapo kam marrë dijeni, kam urdhëruar verifikimin dhe hetimin e çështjes me grup të përbashkët hetimi nga Drejtoria e Përgjithshme e Burgjeve, Shërbimi i Kontrollit të Brendshëm në Burgje ( SHKBB) dhe stafi i Ministrisë së Drejtësisë", u shpreh dje ministrja e Drejtësisë Etilda Gjonaj. Ajo deklaroi se grupi i hetimit, gjatë orëve të natës, ka kryer veprimet hetimore dhe procedurale, në administrimin e provave, pyetjen e stafit administrativ, drejtorin e IEVP Lushnjë, kartelistin pranë këtij institucioni, shqyrtimin e dokumentacionit në IEVP Lushnjë dhe dosjes penale të të dënuarit Lulzim Caka. Në përfundim, si rezultat i shkeljeve të evidentuara, në orët e para të mëngjesit, Shërbimi i Kontrollit të Brendshëm të Burgjeve kreu arrestimin në flagrancë të Judmir Shurdhit, me detyrë Drejtor i IEVP- Lushnjë dhe Llazar Minos, me detyrë kartelist pranë IEVP Lushnjë. Materiali hetimor është referuar në Prokurorinë e Elbasanit, pasi ata akuzohen se kanë konsumuar elementë të veprës penale të "Shpërdorimit të detyrës" dhe "Falsifikim të dokumenteve". Ministrja Gjonaj tha se ka urdhëruar gjithashtu edhe shkarkimin e menjëhershëm të dy punonjësve të përfshirë në këtë ngjarje.
VERIFIKIMET
Pas lirimit të Lul Cakës, ministrja Gjonaj tha se ka urdhëruar ngritjen e një grupi hetimi për verifikimin e të gjitha dosjeve dhe dokumentacionit përkatës në rastet e lirimit të të dënuarve në të gjitha institucionet e ekzekutimit të vendimeve penale. "Qeveria dhe personalisht unë si ministre e Drejtësisë jam e vendosur që të mos bëj asnjë lëshim dhe të vendos përpara përgjegjësisë këdo që shkel ligjin, pasi gur i themelimit në mbarëvajtjen e organeve ligjzbatuese është zbatimi në mënyrë rigoroze e ligjit dhe administrimit të procesit. Në ditët që pasojnë do të realizoj një proces rivlerësimi për të gjithë trupën drejtuese të burgjeve dhe shefave të Policisë si dhe ndërmarrjen e një procesi të ri për rekrutimin e kandidatëve profesionistë dhe me integritet, në pozicione drejtuese, detajet e së cilës do t'i bëj shumë shpejt të ditura", përfundoi Gjonaj.