‘ Babalja’, kërkohet shoqërimi i detyruar i Gazmend Bardhit
Gjykata kërkon dëshminë e prokurorit Besim Hajdarmatajt
Asnjë nga 3 dëshmitarët e thirrur për të dëshmuar dje në gjyqin e çështjes "Babalja", në ngarkim të të pandehurve Albert Veliu dhe Alfred Alizoti, nuk u paraqit në Gjykatë.
Në seancën e djeshme pritej të dëshmonin ish- deputeti i Partisë Demokratike, Gazmend Bardhi, prokurori Besim Hajdarmataj dhe gazetari Ylli Rakipi. Për këtë arsye, Gjykata e Tiranës urdhëroi që ish- deputeti i PD, Gazmend Bardhi, të sillet forcërisht në gjyqin ku shqyrtohet dosja "Babale". E njëjta masë është kërkuar edhe nga Prokuroria, që dje argumentoi se Bardhi është njoftuar dy herë për të dëshmuar në gjyq, por heziton të paraqitet. Pala e akuzës kërkoi gjithashtu edhe shoqërimin me forcë të prokurorit për Krime të Rënda, Besim Hajdarmataj. Por, në këtë rast, Gjykata nuk vendosi njësoj si për Gazmend Bardhin. U vendos që Hajdarmataj të njoftohet sërish për seancën e radhës. Gjithashtu, Gjykata kërkoi nga drejtuesi i Prokurorisë për Krime të Rënda, që të vërë në dispozicion informacione për angazhimin e Hajdarmatajt gjatë ditës së djeshme, rreth orës 12: 00. Prokurori kishte paraqitur në seancë një shkresë, ku shprehej se nuk mund të paraqitej për të dëshmuar në seancën e djeshme, duke qenë se ishte i angazhuar në një gjyq në Gjykatën e Krimeve të Rënda. Gjithashtu, në seancën e djeshme pritej të dëshmonte edhe gazetari Ylli Rakipi, i cili gjithashtu nuk është paraqitur për shkak se ndodhej jashtë Shqipërisë. Gjykata vendosi ta lajmërojë sërish Rakipin, duke e venë në dijeni për seancën e radhës.
DESHMITARET
Të tre personat që nuk u paraqitën dje në seancë, pritej të dëshmonin në Gjykatën e Tiranës për çështjen e njohur si "Babalja". I pranishëm në seancë ishte i pandehuri Fredi Alizoti. Kjo dosje u shoqërua me debate mediatike e politike vitin e kaluar, ndërsa të pandehur kanë përfunduar edhe gazetari Jetmir Olldashi dhe Albert Veliu, i njohur tashmë me pseudonimin "Babalja". Javën e kaluar dëshmoi ishdeputeti i Partisë Demokratike, Enkelejd Alibeaj, duke sqaruar edhe arsyet e publikimit të audio- përgjimit. I pyetur nga prokurori nëse audio- përgjimi është i vërtetë, Alibeaj tha se u mjaftuan me ato që dëgjuan dhe panë dhe nuk ishte i detyruar të provonte autenticitetin e audios. Alibeaj tregoi sesi u përfshi në çështjen, e cila më pas mori emrin "Babalja" dhe që lidhet me audio- përgjimin, që më tepër se një vit më parë bëri bujë në opinionin publik. Dëshmitari shtoi se në cilësinë e drejtorit të Departamentit për Rendin dhe Sigurinë Publike, ai e publikoi audiopërgjimin bashkë me kolegët e tij demokratë, Ervin Salianji dhe Gazmend Bardhi. I pyetur nga avokatët nëse ka pasur një konspiracion në këtë çështje, Alibeaj deklaroi se nuk ka pasur ndonjë qëllim të fshehtë për të goditur dikë personalisht. "Nuk isha i detyruar të provoja autenticitetin e audios. E publikuam pas diskutimeve që bëmë bashkë me Ervin Salianjin dhe Gazmend Bardhin, sepse ishte diçka që duhej bërë publike për ato fakte që kishte. Albert Veliun e kam takuar tek oborri i PD- së, por vetëm i kam dhënë dorën, jo një takim me detaje. E përgëzova për guximin se nuk ishte e paktë ajo që bëri", sqaroi Alibeaj n gjyq. I pyetur nga prokurori nëse kishte prova për autencitetin e audio- përgjimit, i cili më pas rezultoi i pavërtetë, Alibeaj këmbënguli se detyra e tij nuk kërkon që të ketë laborator apo të bëjë ekspertizë, por bazuar në moralin politik dhe perceptimin që krijoi, materiali meritonte të bëhej publik. Kjo ishte edhe arsyeja pse u publikua.