Feronikeli tregon limite, i jep lamtumirën Ligës së Europës
Kampionia e Kosovës, Feronikeli, i ka dhënë mbrëmë lamtumirën aventurës europiane, pas humbjes në shtëpi ndaj Slovan Bratislavës. Feronikeli u mund me rezultatin 2- 0 në stadiumin "Fadil Vokrri" në kuadër të Ligës së Evropës, përballë Slovan Bratislavës. Të besuarit e trajnerit Zekeria Ramadani besonin shumë te goli që kishin shënuar para një jave në Bratislavë, me shpresën për të arritur kualifikimin historik. Takimi nis më mirë për vendësit dhe Yll Hoxha rrezikoi i pari portë, por goditja e tij e fuqishme u prit nga portieri mik. Goli i buzëqeshi miqve nga Sllovakia, që në minutën e 19- të realizuan me De Markon, i cili i gjendur në një pozicion të volitshëm në zonë, me kokë e dërgon topin në rrjetë. Rastin më të mirë për Feronikelin e pati Kastriot Rexha, por gjuajtja e tij nuk e gjeti rrjetën. Pjesa e parë u mbyll në shifrat 1- 0 për sllovakët. Edhe pjesa e dytë ishte pothuajse e njëjtë me të parën. Sllovakët shënuan në minutën e 54- t me Holman, që me një gjuajte të fuqishme në zonë tundi për herë të dytë rrjetën e portës së mbrojtur nga Smakiqi. Përpos zëvendësime, Feronikeli nuk mundi të bëjë më shumë në pjesën e dytë, duke e mbyllur takimin me rezultat 20. Rezultati i përgjithshëm i këtyre dy sfidave shkoi në 4- 1 për miqtë. Feronikeli e mbylli ndeshjen me 10 vetë, ku në minutën e 88- të Zeka mori edhe kartonin e dytë të verdhë, ndonëse lojtari hyri në fushë si zëvendësues në minutën e 60- të. Në këtë tur të dytë të Ligës së Europës Feronikeli tregoi limitet e tij, por aventura europiane konsiderohet pozitive për kampionët e Kosovës.