Basha: Uzurpimi i dhunshëm i pushtetit vendor është kriminal
Kryetari i Partisë Demokratike vijoi ditën e djeshme turin e takimeve të tij në bashkitë që janë drejtuar nga opozita. Dje, ai zhvilloi takime në qytetin e Peqinit dhe të Rrogozhinës, ku theksoi se 30 qershori nuk ishte një proces zgjedhor. Gjatë bashkëbisedimit me strukturat e partisë në Rrogozhinë, kreu i PD- së theksoi se: “30 qershori ishte një farsë antikushtetuese, që u zhvillua në dhunim flagrant të dekretit të Presidentit, kur me Kushtetutë, i vetmi që cakton datën e zgjedhjeve është Presidenti. Po me Kushtetutë, i vetmi institucion që mund të gjykojë mbi dekretet e Presidentit, është Gjykata Kushtetuese, e cila nuk ekziston, sepse e shkatërroi me zell dhe me mburrje Edi Rama për t’i marrë ai pushtetet e Gjykatës Kushtetuese”, tha zoti Basha në një takim në Rrogozhinë me strukturat e Partisë Demokratike. Për argumentet e paligjshmërisë së 30 qershorit, Basha iu referua edhe konstatimeve të raportit paraprak të OSBE- ODHIR- it. “30 qershori është i paligjshëm dhe kriminal që në themel, sepse modeli shqiptar i kontrollit të zgjedhjeve, balanca politike, u shkatërrua, opozitës iu ndalua të merrte pjesë në KZAZ dhe Komisione e qendra votimi. I paligjshëm dhe kriminal sepse në gjysmën e rasteve u kthyem në votimet e diktaturës me një kandidat. Aty ku nuk kishte një kandidat, kandidati tjetër ishte i paligjshëm, siç ishte e paligjshme paterica që krijoi Edi Rama një ditë para ditës së zgjedhjeve, me mercenarë të shitur të Edi Ramës”, u shpreh kreu i PD- së, duke theksuar se për të mbuluar braktisjen nga shqiptarët, Rama përsëriti skemën e dosjeve “339” dhe “184”, duke detyruar përdhunshëm vajtjen në votime të dhjetëra– mijëra votuesve, që lanë gjurmët e tyre dhe i bënë fletët e votimit të pavlefshme.