Mediu: Si dështuan përpjekjet e OSBE për negociata mes palëve
“Opozita duhet të reflektojë. Çështjet e emrave janë tërësisht të parëndësishme”
Kreu republikan, Fatmir Mediu, zbuloi dje se si dështuan përpjekjet e OSBE- së për të negociuar mes palëve politike në Shqipëri për zgjidhjen e krizës.
Në një intervistë për “Top Channel”, Mediu shprehet se opozita iu përgjigj ndërmjetësimit të OSBE- së për të pranuar negocimin, duke zhvilluar disa takime me drejtuesit e OSBE- së në Vjenë. “Ka pasur interes të OSBEODIHR- it për të facilituar një takim ndërmjet palëve, por palët më parë duhet të binin dakord paraprakisht. Se, nuk besoj se do të vijë dikush që i kushton vëmendje Shqipërisë për të ardhur e për të shpenzuar kohë kot apo për t’u refuzuar. Kemi shkuar me Bashën në Luksemburg dhe si opozitë në Vjenë dhe kemi takuar z. Greminger, i cili ka pasur një kërkesë zyrtare edhe nga z. Meta dhe kemi thënë që jemi dakord për dialog mes pozitës dhe opozitës”, tha Fatmir Mediu. Frenimi i rotacionit për pushtetin vendor, zgjedhje të parakohshme lokale e parlamentare me qeveri kujdestare dhe bashkëpunim për një shtet kushtetues ishin disa nga kërkesat e parashtruara nga opozita për dialog. Por, tentativa krejt papritur dështoi. Aleati historik i Bashës tregon arsyet pse. “Ka një qëndrim të marrë në Këshillin e Përgjithshëm të OSBE- së nga ‘ figura e shquar’ që zoti Rama ka vendosur në krye të diplomacisë në kundërshtim me ligjin që s’e ka pranuar një negocim të tillë nga OSBE- ja. Me sa di unë, edhe zoti Rama ka refuzuar kërkesën e zotit Lajçak dhe z. Greminger, por mos me qenë abuziv sepse këto janë informacione të cilat nuk janë zyrtare”, u shpreh Mediu. Sipas aleatit të Bashës, që ndërkombëtarët të negociojnë mes palëve politike në Shqipëri, duhet në radhë të parë që krerët politikë të kenë vendosur një normalitet komunikimi mes tyre. “Unë mendoj se ndërkombëtarët duan një normalitet politik në Shqipëri dhe nëse ne nuk e kuptojmë këtë normalitet në Shqipëri, unë nuk e besoj se ata do të bëhen pjesë e maskaradës apo e idiotësisë politike shqiptare. Pra, ne duhet, në radhë të parë, të krijojmë një kurs diskutimi normal me njëri- tjetrin, pastaj të kemi mundësi për të ofruar. Ka shumë personalitete që janë të gatshëm për të negociuar, siç janë njerëz që janë marrë me Maqedoninë. Por, të paktën të tregojmë përgjegjshmëri minimale”, tha kryetari i Partisë Republikane. Kritikat Fatmir Mediu nuk i kursen as për Lulzim Bashën, i cili, sipas tij, duhet të heqë dorë nga kërkesa e panegociueshme se nuk ulet me Edi Ramën në tryezë për dialog. “Opozita duhet të reflektojë. Çështjet e emrave janë tërësisht të parëndësishme. Nëse ulemi si palë politike, secila palë ka të drejtë të vendosë në tryezë atë që është më efektive. Unë mendoj se duhet të ulen ata që kanë përgjegjësi për të marrë vendimmarrje, sesa aktorë dytësorë që nuk kanë forcë vendimmarrëse dhe që mund ta kthejnë dialogun politik në një lojë të pavlefshme politike. Në këtë këndvështrim unë mendoj se duhet të ulemi sa më parë në dialog”, tha Mediu. Kryerepublikani është i mendimit që opozita duhet të ndryshojë kurs dhe të hartojë një plan të ri aksioni ku të përfshijë edhe ndërveprimin me ndërkombëtarët.