KLGJ emëron 10 gjyqtarë të rinj në sistem
Këshilli synon të ulë stokun e çështjeve në këto gjykata
Këshilli i Lartë Gjyqësor ka futur në sistem 10 gjyqtarë të rinj. Në mbledhjen e fundit të zhvilluar, KLGJ i ka caktuar ata në disa gjykata të rretheve, duke bërë që të plotësohet kështu një pjesë e vakancave të krijuara nga shkarkimet e shumta për shkak të rivlerësimit kalimtar. “Një tjetër vendimmarrje e rëndësishme e Këshillit ishte caktimi në pozicion i 10 gjyqtarëve të emëruar në mbledhjen e datës 19.7.2019”, njoftoi KLGJ. Në njoftim më tej sqarohet se për caktimin në pozicionet e lira të gjyqtarëve të sapoemëruar, Këshilli ka mbajtur në konsideratë renditjen e tyre në listën e të diplomuarve nga Shkolla e Magjistraturës dhe preferencat e shprehura nga vetë magjistratët, dy kritere të përcaktuara nga ligji “Për statusin e gjyqtarëve dhe prokurorëve në Republikën e Shqipërisë”.
GJYQTARËT Më konkretisht, Këshilli Lartë Gjyqësor caktoi në Gjykatën Administrative të Shkallës së Parë Shkodër gjyqtaren Afërdita Caco. Në Gjykatën e Rrethit Gjyqësor Dibër, Ardit Kukën. Në Gjykatën e Rrethit Gjyqësor Gjirokastër, Suela Dashin. Në Gjykatën e Rrethit Gjyqësor Korçë, Ervin Sulajn. Në Gjykatën e Rrethit Gjyqësor Kukës, Merita Karaj. Në Gjykatën e Rrethit Gjyqësor Kurbin, Olti Skrame. Në Gjykatën e Rrethit Gjyqësor Lushnjë, Lorena Çabej. Në Gjykatën e Rrethit Gjyqësor Pukë, Amarilda Sulaj. Në Gjykatën e Rrethit Gjyqësor Sarandë, Suela Xhanin dhe në Gjykatën e Rrethit Gjyqësor Tropojë, gjyqtare Enkeleda Dalipin. Sipas KLGJ- së, caktimi në pozicione në gjyqësor i 10 gjyqtarëve të rinj ka një rëndësi të veçantë për sistemin gjyqësor, pasi mundëson rifunksionalizimin e disa gjykatave të vogla, të cilat kanë probleme me organikat e tyre, duke plotësuar vakancat e krijuara, për shkak të shkarkimit të gjyqtarëve nga procesi i vetingut, dorëheqjeve apo daljeve në pension të gjyqtarëve. “Me këtë vendimmarrje KLGJ synon të ulë stokun e çështjeve në 10 gjykata, duke garantuar efikasitetin e këtyre gjykatave dhe garantuar aksesin e pandërprerë të qytetarëve në drejtësi në 10 rrethe gjyqësore”, shkruhet në vendim.