S’ka kandidatë, KED vendos për garën në Kushtetuese
Meta kritikon vonesën në ndryshime e problematikat e shumta
Presidenti i Republikës, Ilir Meta, dekretoi këtë të hënë ndryshimet dhe shtesat në ligjin “Për statusin e gjyqtarëve dhe prokurorëve”.
Ligjet u miratuan disa muaj më parë në Kuvend, ndërsa me dekretimin e Presidentit tashmë janë të detyrueshme për t’u respektuar dhe i hapin rrugë krijimit dhe funksionimit të institucioneve të reja, siç është edhe Inspektorati i Lartë i Drejtësisë. Duke iu referuar njoftimit, Presidenti Meta shkruan se ligjit të miratuar në vitin 2016 i janë bërë më shumë se 14 ndërhyrje për përmirësimin e tij, gjë që tregon se “ka pasur probleme antikushtetutshmërie, për të cilat ka folur Gjykata Kushtetuese, gjithashtu ka pasur edhe mangësi të tjera të karakterit të teknikës legjislative, shprehje të pasakta, gabime në referime etj., që nëse do të ishte gjykuar në mënyrë të thelluar dhe jo të nxituar nga ekspertët vendës dhe ndërkombëtarë në momentin e hartimit të ligjit nr. 96/ 2016 dhe miratimit nga Kuvendi i Shqipërisë, nuk do të ekzistonin”. Duke kritikuar edhe vonesën në ndryshime, Presidenti kërkon nga organet e reja, të ngritura tashmë, Këshilli Lartë Gjyqësor dhe ai i Prokurorisë, “që sistemi gjyqësor dhe ai i Prokurorisë të funksionojnë në mënyrën e duhur”. Ndërkohë, një tjetër ligj i dekretuar nga Meta është edhe ai “Për nismën ligjvënëse të zgjedhësve në Republikën e Shqipërisë”. Ky ligj u krijon mundësi qytetarëve që të dërgojnë në Kuvend propozime të ligjeve për miratim. Ky ligj ka për qëllim të rregullojë procedurën e detajuar mbi ndërmarrjen e nismave ligjvënëse popullore nga 20 mijë shtetas me të drejtë vote, duke filluar nga momenti i regjistrimit të nismës, deri në paraqitjen e tyre në Kuvend.