“13 tetori”, LSI, PR e PAA dorëzojnë kërkesën për zgjedhje
LSI, PR e PAA kërkojnë të bëhen zgjedhje. PD: Anëtarët e PS në KQZ do të mbajnë përgjegjësi penale
Ditën e djeshme skadoi edhe afati për regjistrimin e subjekteve zgjedhore në Komisionin Qendror të Zgjedhjeve për Dekretin e Presidentit Meta, i cili caktoi datën 13 tetor për zhvillimin e zgjedhjeve lokale.
Pranë Komisionit Qendror të Zgjedhjeve janë paraqitur zyrtarisht tre parti, Lëvizja Socialiste për Integrim, Partia Republikane dhe Partia Agrare Ambientaliste.
QËNDRIMET LSI depozitoi e para kërkesën për regjistrimin në Zgjedhje pranë KQZ- së. Sekretari i përgjithshëm i LSI- së, Endrit Braimllari, kërkoi nga KQZ- ja vijimin e procedurave për organizimin e Zgjedhjeve. “Kemi dërguar sot kërkesën për regjistrim të Lëvizjes Socialiste për Integrim në Zgjedhjet e 13 tetorit, tanimë me dekret të Presidentit të Republikës. Kjo vjen pas kërkesës së bërë KQZ- së nga disa parti opozitare, që të fillojë me procedurat megjithëse kamikazë të katër përfaqësuesve të KQZ- së vendosën që të mos merrnin pjesë në mbledhje. Zgjedhjet janë më 13 tetor, ka një dekret të Presidentit të Republikës dhe zgjedhjet janë të detyrueshme për të gjithë. Kush nga kamikazët e rilindjes në KQZ nuk respekton dekretin e Presidentit, nuk respekton Kushtetutën dhe ligjet e Republikës së Shqipërisë, do të mbajë përgjegjësitë e veta penale. Me sa duket këto i kanë marrë parasysh të bëhen kamikaz të Edi Ramës dhe të rilindjes dhe t’i mbajnë vetë përgjegjësitë që do të kenë në të ardhmen”, theksoi Braimllari. Partia Demokratike nga ana e saj e njeh dekretin e Presidentit Meta për zhvillimin e Zgjedhjeve lokale në 13 tetor, por nuk është regjistruar në KQZ. Sekretari i Përgjithshëm i LSI- së iu përgjigj pyetjes së një përçarjeje të mundshme në frontin opozitar duke theksuar se: “Unë kam ardhur në emër të Lëvizjes Socialiste për Integrim për të regjistruar kërkesën për regjistrim të LSI- së. Ajo ç’ka është e rëndësishme është që data 13 tetor është ditë zgjedhjesh e ligjshme në vend për zgjedhjet për pushtetin lokal dhe është e respektueshme nga të gjithë”. Partia Demokratike nga ana e saj doli dje në një deklaratë zyrtare ku theksoi se 13 tetori është data e ligjshme për Zgjedhjet lokale dhe se: “Refuzimi i KQZ për të zbatuar Kushtetutën rikonfirmon se Edi Rama kontrollon në mënyrë të paligjshme atë dhe çdo institucion tjetër. PD- ja paralajmëron shërbëtorët dhe kamikazët e KQZ se shpejt do të mbajnë përgjegjësi penale për aktet kriminale me të cilën dhunojnë Kushtetutën dhe ligjet e vendit”.