Balla: Zgjedhjet e ardhshme në 2021, opozita “me halle” të mëdha
Sekretari i Përgjithshëm i Partisë Socialiste, Taulant Balla, theksoi dje se zgjedhjet e ardhshme do të jenë ato të vitit 2021, duke hedhur poshtë kërkesën e partive opozitar për t’u regjistruar në zgjedhje. Gjatë një deklarate për mediat, numri dy i Partisë Socialiste e cilësoi si “hall të pazgjidhshëm të opozitës” kërkesën për zhvillimin e zgjedhjeve vendore në 13 tetor. “Zgjedhjet e 30 qershorit ishin një moment i rëndësishëm ku fitoi qytetaria, fitoi ligji, fitoi Kushtetuta e vendit dhe mendoj që të mos e bëjmë më qesharake sjelljen e opozitës dhe do të hezitoja të bëja ndonjë koment lidhur me ato që informoni ju sepse zgjedhjet e 30 qershorit janë zhvilluar, kanë përfunduar. Të zgjedhurit prej tyre, qofshin këta kryetarë të bashkive apo anëtarë të këshillave bashkiakë, kanë marrë detyrën tashmë ose janë duke marrë detyrën edhe në këtë moment që flasim bashkë. Kështu që nuk kam asnjë koment për halle të pazgjidhshme të përfaqësuesve, siç citoni ju të opozitës. Zgjedhjet e përgjithshme do të zhvillohen në vitin 2021”, theksoi Taulant Balla. Numri dy i PS- së u ndal te mundësia e inicimit të një dialogu për kapërcimin e krizës politike në vend. Ai theksoi se dora e socialistëve është e shtrirë për bashkëpunim me opozitën jashtëparlamentare në Reformën Zgjedhore. “Ajo që dua t’ju them është që dora jonë është e shtrirë për të bashkëpunuar pikësëpari me opozitën në Parlament për të adresuar tërësisht rekomandimet e OSBE- ODIHR, por edhe të KiE, që lidhen me një Reformë Zgjedhore gjithëpërfshirëse me qëllim që zgjedhjet e përgjithshme të vitit 2021 të zhvillohen me një Kod Zgjedhor, që ka adresuar të gjitha rekomandimet në 3 zgjedhjet e fundit”, theksoi Sekretari i Përgjithshëm i Partisë Socialiste. Që pas përfundimit të procesit zgjedhor të 30 qershorit, maxhoranca ka ulur tonet e sulmeve politike ndaj opozitës jashtëparlamentare. Socialistët u angazhuan në zonat e tyre elektorale për të lehtësuar konsituimin e këshillave të rinj bashkiakë dhe betimin e kryetarëve bashkiakë të dalë nga zgjedhjet vendore të 30 qershorit.