Bashkëqeverisja, Rama: Jemi mbi kokat e zyrtarucëve
"Platforma e bashkëqeverisjes është një urë që na lidh mes nesh"
Kryeministri Rama theksoi dje se platforma e bashkëqeverisjes e ngritur prej tij ka sjellë ndryshim në ofrimin e shërbimeve të administratës publike ndaj qytetarëve. Ditën e djeshme, Rama e nisi ditën duke lavdëruar këtë platformë e duke akuzuar ata zyrtarë shtetërorë, të cilët kanë abuzuar më parë me detyrën e tyre, duke mos ofruar shërbimet ndaj qytetarëve. Në një postim në "Facebook", kreu i qeverisë theksoi se: "Bashkëqeverisja nuk është slogan, po një përpjekje e mundimshme dhe e përditshme për të thyer barrierat që për dekada janë ngritur mes qytetarit dhe zyrave të shtetit; barrierën e mospërfilljes të zyrtarucit ndaj qytetarit që kërkon një dokument; barrierën e nëpërkëmbjes së qytetarit nga zyrtaruci që kërkon një ryshfet; barrierën e mohimit të së drejtës së qytetarit, prej zyrtarucit në sportel! Platforma e bashkëqeverisjes është një urë që na lidh mes nesh, mbi kokat e zyrtarucëve e mbi lumin e justifikimeve, zvarritjeve, refuzimeve të administratës; është një mekanizëm që na bashkon kundër së keqes së futur thellë ndër dekada të tëra në trupin e administratës; është një hapësirë ku nga bashkimi i forcave, qytetarët dhe qeveria, fitojnë mijëra e mijëra beteja të padukshme, ku pala e qytetarëve zgjidh mijëra e mijëra halle "të vogla" dhe pala e qeverisë identifikon burime problemesh për qytetarin, e pastron nga trupi i shtetit parazitë të fshehur nën petkun e zyrtarit. Bashkëqeverisja është një filozofi e re në ushtrimin e pushtetit dhe natyrshëm has shumë skepticizëm nga qytetarët e pengesa nga burokratët. Por kjo është një rrugë e drejtë, e mirë dhe e dobishme, prej së cilës nuk mund dhe nuk duhet të heqim dorë. Por, do ta ndërtojmë me këmbëngulje të madhe e durim edhe më të madh".