Zaptuan plazhin në Velipojë e Pogradec, në hetim 12 biznesmenë
Aksioni "Plazh i lirë" i Policisë së Shtetit është shtrirë në Pogradec dhe Velipojë, ku janë proceduar penalisht 12 pronarë subjektesh për zaptim të plazhit publik, por dhe për fshehje të të ardhurave. Nëntë prej biznesmenëve janë kapur në shkelje në Velipojë, kurse tre të tjerët në Pogradec.
"Policia e Shkodrës, në bashkëpunimin me FNSH Shkodër, liron dhe vë në dispozicion të pushuesve rreth 3000 m2 plazh, pronë publike, e zaptuar në mënyrë të kundërligjshme. Procedon penalisht 9 pronarë subjektesh në Velipojë, nga të cilët: 8 pronarë të subjekteve tregtare për veprën penale "Fshehja e të ardhurave" dhe 1 shtetas për veprën penale "Zënia e hapësirave publike". Specialistët për Hetimin e Krimit Ekonomik e Financiar në Drejtorinë Vendore të Policisë Shkodër proceduan penalisht për veprat penale ' Fshehja e të ardhurave' dhe ' Mospagim i taksave dhe tatimeve' shtetasit E. E., Gj. Rr., P. N., K. M., K. Gj., N. R., N. U. dhe L. F., të cilët në plazhin publik Velipojë kryenin aktivitetin e tyre në mënyrë të paligjshme. Po në vijim të operacionit u procedua penalisht për veprën penale ' Pushtimi i tokës', shtetasi Gj. F., pasi nga kontrolli i ushtruar, u konstatua se ky shtetas kishte zënë me çadra plazhi e shezlongë hapësirat publike në bregun e detit pa leje nga organet përkatëse", bëhet e ditur nga Policia.
Ndërkohë, nga kontrollet në Pogradec janë proceduar penalisht për veprën penale "Fshehja e të ardhurave", 3 shtetas, të cilët ushtronin aktivitetin privat të tyre, pa dokumentacionin përkatës. "Specialistët për Hetimin e Krimit Ekonomik e Financiar në Drejtorinë Vendore të Policisë Korçë, në vijim e zbatim të planit të masave për evidentimin, ndëshkimin e paligjshmërisë dhe konkretisht goditjen e rasteve kundër informalitetit, proceduan penalisht shtetasit: E. M., 31 vjeç, A. M., 46 vjeç dhe SH. R., 22 vjeç, banues në Pogradec, pasi gjatë kontrolleve që shërbimet e Komisariatit të Policisë Pogradec kanë ushtruar në aktivitetet e shtetasve të lartpërmendur ( plazhe private), në Pogradec, janë konstatuar një pjesë e shezlongëve pa dokumentacionin përkatës", thuhet në njoftimin e Policisë.