Gjonaj, “Memorandum Mirëkuptimi” me Ambasadën e Norvegjisë

Ministria e Drejtësisë njoftoi se ka nënshkruar një memorandum me ambasadorin e Norvegjisë në Shqipëri. Ky memorandum është nënshkruar dje, gjatë një takimi të ministres Etilda Gjonaj me ambasadorin e Norvegjisë për Shqipërinë dhe Kosovën, Per Strand Sjaastad. I konsideruar si “Memorandumi i Mirëkuptimit”, sipas njoftimit të MD, ka qëllim bashkëpunimin më të ngushtë të dy vendeve, në mënyrë që të vihet në zbatim projekti “Forcimi i Sistemit të Ndërmjetësimit në Shqipëri”, i cili do të rrisë aksesin e qytetarëve në drejtësi. “Fill pas një diskutimi të frytshëm mbi disa nga objektivat dhe sfidat kyçe të MD, nënshkruam “Memorandumin e Mirëkuptimit” me qëllim bashkimin e përpjekjeve tona për zbatimin e projektit “Forcimi i Sistemit të Ndërmjetësimit në Shqipëri” i cili do të rrisë aksesin e qytetarëve në drejtësi. Gjithashtu, përmes kësaj iniciative synohet të jepen njohuri të mjaftueshme në mënyrë që ligji i ri për ndërmjetësim të jetë i zbatueshëm dhe i kuptueshëm nga aktorët kyç, për të nxitur më tej bashkëpunimin. Ndërkohë, qëndrimi pro hapjes së negociatave për Shqipërinë me Bashkimin Evropian, ftesat për bashkëpunim, gatishmëria për të investuar, janë të tjera sinjale pozitive të takimit që intensifikojnë më tej marrëdhëniet tona me Norvegjinë”, njoftoi dje Ministria e Drejtësisë në faqen zyrtare në “Facebook”. Më tej, gjatë takimit, Gjonaj bënë me dije se Ambasadori shprehu vlerësime për ndryshimet e reja në sistemin e drejtësisë dhe rolin e Qeverisë. “I shpreha mirënjohje për mbështetjen dhe bashkëpunimin në projektin e ri dy vjeçar me vlerë rreth 600 000 euro, që u konkretizua me nënshkrimin e marrëveshjes së mirëkuptimit në fushën e ndërmjetësimit, e cila konsiston në mbështetje me asistencë teknike dhe financiare”, shkruan Gjonaj.