Kuvendi i Kosovës zgjedh të shpërbëhet më 22 gusht
Haradinaj: Veprim i duhur, konform ligjeve dhe Kushtetutës
Kosova do të shkojë shumë shpejt drejt zgjedhjeve të parakohshme pas një vendimi të Kryesisë së Kuvendit për t’u shpërndarë dhe pajtimit të të gjitha partive politike që Kuvendi të shpërndahet.
Si rrallë herë, shefat e grupeve parlamentare, me përjashtim Lëvizjen Vetëvendosje, janë pajtuar mes tyre dhe me Kryeparlamentarin, Kadri Veseli. Kështu vendi shkon në zgjedhje të parakohshme. Para shpërbërjes së Kuvendit, partitë politike u pajtuan që më 22 gusht të ratifikojnë marrëveshjen financiare për IPA- në 2018 ndërmjet Kosovës dhe Bashkimit Europian, në vlerë rreth 90,5 milionë euro, një shumë e cila rrezikohej të humbiste në rast se nuk do të ratifikohej në kohë. Kryetari i Kuvendit të Kosovës, Kadri Veseli, tha se zgjedhjet janë e vetmja zgjidhje në situata si kjo, krijuar pas dorëheqjes së Kryeministrit, Ramush Haradinaj. Por, data e caktuar për ta shpërbërë Kuvendin, është çështja që ka krijuar mospajtim me Lëvizjen Vetëvendosje. Sipas deputetes Albulena Haxhiu, kjo hapësirë kohore deri më 22 gusht, krijon mundësi që subjektet politike, përfshirë edhe LDK- në dhe PSD- në, të bëjnë pazare për qeveri teknike ose caktimin e një mandatarit të ri. Caktimi i datës së shpërbërjes së Kuvendit të Kosovës është bërë pas refuzimit të ftesës së Presidentit, Hashim Thaçi, që koalicioni PAN të propozojë një mandatar të ri, pas dorëheqjes së Ramush Haradinajt. Kreu i PAN, Kadri Veseli, tha se nuk do të ketë asnjë mandatar të ri pasi zgjidhja më e mirë është që vendimet t’i lihen popullit nëpërmjet votimit. Vendimi është përshëndetur nga Kryeministri në largim, Haradinaj, i cili gjatë deklaratës për dorëheqje tha se vendi duhet të shkonte drejt zgjedhjeve të reja.
“Vendimi i Kryesisë së Kuvendit për të mbajtur seancë me 22 gusht 2019, për shpërbërjen e Kuvendit, është veprim i duhur dhe konform ligjeve dhe Kushtetutës së vendit”. Kështu u shpreh Haradinaj. Ai tha se ky vendim do t’i hapë rrugë procesit zgjedhor në vend “si opsion i vetëm dhe i domosdoshëm”. “Po ashtu, është për t’u përshëndetur vendimi i kësaj kryesie, që para shpërbërjes, Kuvendi të votojë për Marrëveshjen Ndërkombëtare IPA2, nga e cila Kosova fiton rreth 90 milionë euro fonde nga BEja”, ka thënë Haradinaj. Ai përfundoi duke thënë se kthimi i mandatit te sovrani dhe zgjedhjet e lira dhe demokratike, janë jetike për vendin dhe për proceset e rëndësishme që e presin atë.