Johnson: Nuk ka “nëse”, më 31 tetor largohemi nga BE- ja
Kryeministri britanik, Boris Johnson, ka siguruar se vendi do të dalë nga BE në fund të tetorit me apo pa marrëveshje, dhe kjo nuk mund të ndalohet as nga Parlamenti. Zëdhënësi i tij tha që Britania e Madhe do të vazhdojë të punojë për të kërkuar një marrëveshje daljeje me kolegët në Bashkimin Europian, dhe se qeveria shpresonte që blloku të ndryshojë qëndrimin e tij për ndalesën doganore irlandeze. “Britania do të largohet nga BE më 31 tetor pavarësisht nga pasojat. Nuk ka ‘ nëse’ ose ‘ pse’. Ne duhet të rivendosim besimin në demokracinë tonë dhe të përmbushim premtimet e bëra për qytetarët. Politikanët nuk mund të zgjedhin që votat e kujt do të respektohen. Ata janë zotuar të respektojnë rezultatet e referendumit dhe ne duhet ta bëjmë atë”, tha zëdhënësi i Johnson. Por, zëdhënësja e Komisionit Europian, Mina Andreeva tha se KE ishte e hapur për bisedime me Kryeministrin Johnson, në mënyrë që të shmangte një Brexit të rëndë që mund të shkaktojë një rënie të madhe ekonomike. Ajo shtoi se një marrëveshje Britani- BE mbi Brexit tashmë është arritur. “Por ne jemi të hapur për të diskutuar deklaratën politike”, tha Andreeva. Sekretari britanik i Shëndetit, Matt Hancock, tha se Parlamenti nuk mundet të bllokojë më një Brexit pa marrëveshje. Jeremy Corbyn tha se Laburistët do të bënin çdo gjë për të ndaluar një largim pa marrëveshje nga BE. Por, Kryeministria tashmë e ka vendosur që largimi do të ndodhë më 31 tetor, qoftë edhe pa marrëveshje, edhe pse ky nuk është opsioni i preferuar nga liderët e të dyja palëve.