Gol pas 15 muajsh, Roshi jep fitoren pasi shënon me sup
"Kopjon" shokët shkodranë Guri dhe Balaj, rikthen 3 pikët për Akhmat Groznin
Ka qenë fundjava e golave për kuqezinjtë. Sindrit Guri hapi siparin me dy gola në Belgjikë dhe më pas iu përgjigj shkodrani tjetër, Bekim Balaj.
Ky gol në debutim i dha fitoren Shturm Gracit në Austri. Nuk kishte si të ndodhte ndryshe dhe shoku i tyre do t'u përgjigjej. Odise Roshi, dje e ka nisur nga stoli përballjen në kampionat, por ka shënuar golin e fitores për Akhmat Groznin. Tre shokë, në formë ideale gjatë fundjavës, kanë më shumë arsye për të festuar së bashku nëse do të bashkohen javën e parë të shtatorit në Kombëtaren kuqezi.
GOLI
Futbollisti i Kombëtares, Odise Roshi, ka gjetur rrugën e rrjetës në kampionatin rus me fanellën e Akhmat Groznit në përballjen ndaj Orenburgut, e vlefshme për javën e 4- t. Mesfushori fierak nuk u preferua nga trajneri në startin e ndeshjes, teksa u hodh në fushën e lojës në fillim të pjesës së dytë, duke zënë vendin e Bernard Berishës. Vetëm 25 minuta i kanë mjaftuar futbollistit shqiptar, teksa në të 70- ën arriti të tundte rrjetën pas daljes së gabuar të portierit, duke goditur saktë me kokë. Një goditje dënimi nga e majta e gjeti futbollistin kuqezi në qendër të zonës, për të finalizuar me kokë krosimin nga shoku i tij i ekipit, Roshi gjeti kohën dhe me kokë realizoi të parin gol për këtë sezon. Madje, një gjuajtje jo shumë e pastër me kokë, teksa sfera i përplaset edhe në sup përpara se të shkojë drejt rrjetës.
PAS 15 MUAJSH
Ky është goli i parë i 28vjeçarit pas rikthimit nga dëmtimi i gjatë, teksa të fundit gol e ka shënuar në maj 2017. Atij iu desh që më shumë se gjysmën e sezonit të shkuar ta kalonte në terapi rikuperimi pas ndërhyrjes kirurgjikale në gju. Me Kombëtaren u rikthye në formë, teksa sapo u aktivizua ndaj Andorrës dha asistin për golin e Cikalleshit. Një shpërthim në të majtë tregoi edhe një herë peshën që ai ka në ekipin përfaqësues. Akhmat Grozni ka siguruar fitoren, pikërisht falë golit të mesfushorit kuqezi. Pas dy humbjesh radhazi, ekipi nga rajoni i Çeçenisë i rikthehet fitores në kampionatin rus, duke regjistruar dy humbje dhe dy fitore pas katër javësh.