TRI NDRYSHIMET Pas indeksimit, shtesë tjetër për pensionistët
Relacioni i qeverisë, nga ndryshimet në skemën e llogaritjes për pensionet e reja tek indeksimi dhe bonusi që do marrin të gjithë pensionistët
Në planin e vendimeve dhe ligjeve të qeverisë, parashikohen katër ndryshime në mënyrën e llogaritjes së pensionit si dhe në shtesën mujore të përfitimit.
Gjatë vitit 2019, qeveria ka parashikuar dy ndryshime në llogaritjen e masës së pensionit, pra, që u shërbejnë atyre që do dalin në pension. Nga ana tjetër, janë edhe dy rritje të pensionit. Indeksimi, që ndodhi gjatë muajit prill, pra, shtesa për kompensimin e rritjes së çmimeve si dhe shpërblimi i fundvitit. Ndryshe nga fondet për indeksimin, fondet për shpërblimin e pensionistëve miratohen në pjesën e dytë të vitit. KUSH DEL NË PENSION
Në janar të këtij viti, qeveria parashikoi katër projektvendime. I pari ishte ndryshimi i kontributeve për pension. Sipas relacionit të qeverisë kjo, “Do të reflektojë rritjen e pagave në masën e kontributeve. Diferencimi i masës së kontributeve në zbatim të ndryshimeve të pritshme në legjislacionin e sigurimeve shoqërore”. Ndryshimi tjetër ishte rritja e koeficienteve për llogaritjen e pensionit. Sipas qeverisë, kjo “ka si qëllim përcaktimin e koeficienteve të indeksimit të bazës së vlerësimit vjetor individual, për llogaritjen fillestare të pensioneve”. Këto dy ndryshime, të miratuara tashmë, u kanë dhënë më shumë pension atyre që mbushin moshën këtë vit për të dalë në pension. Koeficientet e rritur të indeksimit bëjnë që baza për llogaritjen e pensionit të jetë më e lartë dhe si rrjedhojë edhe pensioni më i lartë. Por, këto dy politika nuk prekin 650 mijë pensionistët.
RRITJA E RE Ajo që prek pensionistët është shtesa e pensionit. Qeveria për këtë vit kishte parashikuar dy shtesa. E para ishte indeksimi. Në prill, të gjitha pensionet u shtuan me 2.8 për qind. Në fakt, indeksimi nuk mund të quhet rritje pensioni, pasi si logjikë shërben për të mos ulur pensionin në krahasim me çmimet e tregut. Një pensionist, pas shtesës 2,8 për qind, blen njësoj të mira dhe shërbime si para një viti, por 2.8 për qind më të shtrenjta.
Rritja tjetër e pensionit pritet të vijë bashkë me ndryshimin e buxhetit. Qeveria socialiste që nga viti 2013 nuk i rrit pensionet, por vetën i indekson. Duke shmangur rritjen, qeveria ka menduar ta kompensojë këtë politikë të përvitshme të ish- qeverisë së djathtë me një tjetër shtesë. Shpërblimin e fundvitit. Qeveria është zotuar se çdo vit do të ketë një shpërblim për pensionistët. Vjet, ky shpërblim ishte 5 mijë lekë. “Shpërblimet e fundvitit janë pjesë e paketës së solidaritetit, të cilat do të miratohen me ndryshimet e buxhetit të vitit 2019”, thuhet në relacionin e qeverisë. Këto ndryshime pritet të kryhen pas mbarimit të verës. Burime nga Financat saktësojnë se edhe këtë vit, bonusi për pensionistët pritet të jetë në këto nivele, për rreth 5 mijë lekë për çdo kategori.