Bie Kamza, Rakip Suli ulet në vend të Xhelal Mziut
Basha: Për dhunën hajdutërore, të dy këta kriminelë do të përgjigjen shpejt para ligjit
Bashkia e Kamzës, një nga bastionet e Partisë Demokratike, dje kaloi në administrimin e Rakip Sulit, socialisti që mori mandatin e kryebashkiakut pas zgjedhjeve të 30 qershorit.
Futja e Sulit brenda ambienteve të Bashkisë së Kamzës nuk ishte një mision i lehtë për socialistët, pasi hasën në oponencën e demokratëve.
BETIMI Ceremonia e Betimit të Këshillit të Ri bashkiak të dalë nga zgjedhjet e 30 qershorit u thirr nga Prefektja e Tiranës, Suzana Jahollari, në ambientet e Shkollës “Ibrahim Rrugova” në qendër të Kamzës. Kjo pasi demokratët nuk pranuan rotacionin e bashkisë dhe lejimin e betimit të Këshillit të ri Bashkiak të Kamzës brenda ambienteve të bashkisë. Pas betimit të Këshillit, radha i erdhi Rakip Sulit që tani më është edhe kryebashkiaku i ri i Kamzës. Kjo ceremoni nisi në mesditën e djeshme dhe përfundoi brenda disa minutave. Më pas, gjithçka mbeti pezull. Socialistët kishin parashikuar të njëjtin skenar siç ndodhi në disa bashki që më parë ishin drejtuar nga PD si Devolli, Kavaja etj. Ata pritën orën 16: 00 kur është edhe orari zyrtar i punës për administratën për futjen e tyre brenda Bashkisë së Kamzës.
“MARRJA E KËSHTJELLËS” Pas tri orë pritjeje, socialistët iu drejtuan godinës së Bashkisë së Kamzës duke tentuar për t’u futur brenda saj. Gjatë ditës së djeshme shumë simpatizant të Partisë Demokratike dhe të ish- kryetarit të Bashkisë së Kamzës, Xhelal Mziu, qëndruan përpara ambienteve me pankarta në duar duke akuzuar PS se po uzurpon një pushtet vendor nëpërmjet një kryebashkiaku të dalë nga zgjedhje ilegjitime. Socialistët nga ana e tyre treguan durim dhe në orën 16: 05 ata shkuan te dera e bashkisë për t’u futur brenda. Por porta kryesore ishte e mbyllur dhe u desh thyerja e xhamit dhe ndryshimi i bravës, që ata të futeshin brenda. Pas kësaj, socialisti Rakip Suli u ul në karrigen e kryebashkiakt të Kamzës dhe dha edhe prononcimin e parë duke theksuar se: “Në radhë të parë, mua nuk më shqetësojnë ngjyrat, do të merrem me hallet dhe problemet që i shqetësojnë nga mëngjesi në darkë. Në këtë bashki shërbimet kanë munguar, por sikur e deklarova edhe në momentin e betimit do të jem kryebashkiak i të gjithëve, pasi fëmijët nuk e dinë për kë votoi prindi, por dua kopshtin, çerdhe, shkolla etj. Vendimi i parë i imi është për sa i përket masave për kopshtet dhe shkollat për vitin e ri shkollor, më pas pastrimi që është problem shumë madhor dhe e treta vendosja në eficencë e administratës në shërbim të njerëzve”.
REAGIMI I PD Partia Demokratike reagoi zyrtarisht pas futjes së socialistëve brenda Bashkisë së Kamzës. Nëpërmjet kryetarit Basha, PD theksoi se Suli do të përgjigjet përpara drejtësisë. “Hajduti, Rakip Suli, me ndihmën e banditit, Sali Skura, dhunuan dhe zaptuan sot me forcë selinë e Bashkisë Kamzë. Për dhunën hajdutërore të dy këta kriminelë do të përgjigjen shpejt para ligjit! Uroj për të mirën e tyre dhe të Hajdutit Psikik, që ajo ditë të vijë më shpejt se dita e përballjes me zemërimin e popullit”, theksoi Basha.