Spiropali: Meta na kujton se s’kemi President. Presidenca: Dhimbje për të çmendurën
Prej dy ditësh, Presidenti Meta po kthen ligje të miratuara nga maxhoranca në seancën e fundit plenare të datës 18 korrik. Këto vendime të Presidentit kanë sjellë përplasjen e radhës institucionale ndërmjet Qeverisë dhe Presidencës. Zëdhënësja e qeverisë, Elisa Spiroipali, reagoi ndaj vendimit të Presidentit që ktheu për rishqyrtim projektligjin për disa ndryshime në Kodin Penal. Në një postim në “Facebook”, Spiropali shkroi se: “Nga lartësia e maleve ku thotë se po ngjitet me Çelebiun e tij, Baba Xhikja lëshoi dje një tjetër krisëm nga dyfeku presidencial. Me një fjalor të katandisur si mos më keq, ai qëlloi mbi shumicën dhe opozitën parlamentare, ai na rikujtoi se nuk kemi më President, po në vend të Presidentit na ka mbetur një karikaturë e vetë Ilir Metës”. Ky qëndrim i zëdhënëses së qeverisë solli edhe reagimin e Presidencës. Zëdhënësi i Metës, Tedi Blushi, po në një postim në “Facebook”, theksoi se qeveria nuk reagon ndaj neneve të ligjit për koncesionet. “E çmendura E., foli sot për shumë gjëra, por në asnjë rresht për thelbin e problemit: nenet e dyshimta klienteliste 17 dhe 18 të ligjit famoz të PPP- ve, që në muajt e verës i krijojnë hapësirë pakicës që nuk do rotacion, të sulet drejt pronave publike për të zhvatur ç’të mundë deri në vjeshtë. Dhimbje për të çmendurën E., cila pasi nxori me këpucë të kuqe doganat, nuk i bën përshtypje t’i nxjerrë dritat e kuqe të gjithë ekonomisë kombëtare, pavarësisht paralajmërimeve të institucioneve ndërkombëtare”, theksoi Blushi.