Kanabis, e pëson keq 57- vjeçari dhe dhëndri i tij
Prangosja erdhi pas mbajtjes në përgjim për disa ditë
KORÇE - Kultivonin kanabis, përfundojnë në pranga dy persona. Policia e Korçës ka arrestuar një 57- vjeçar dhe dhëndrin e tij, pasi zbuluan rrënjë kanabisi të kultivuara në një zonë mes fshatrave Denas dhe Punmirë. Ndërkohë, përveç kultivimit të kanabisit, ata do të akuzohen dhe për armëmbajtje pa leje pasi, gjatë kontrollit iu gjetën dhe katër armë gjuetie, ku një prej tyre ishte e modifikuar. Policia bën të ditur se, finalizimi i operacionit për arrestimin e tyre erdhi pas mbajtjes në përgjim. Ndërkohë nga ana e Policisë dhe Prokurorisë së Korçës nuk bëhet i ditur numri i saktë i rrënjëve të kanabisit që janë asgjësuar gjatë operacionit. “Specialistët për Hetimin e Krimeve në Komisariatin e Policisë Korçë, pas një pune hetimore të mirorganizuar të ndjekur me metoda speciale të hetimit, nën drejtimin e Prokurorisë të Rrethit Gjyqësor Korçë, finalizuan me sukses operacionin e koduar “Denas”, ku në bashkëpunim me Njësinë Operacionale të Rendit Publik në Drejtorinë Vendore të Policisë Korçë, bënë ndalimin e shtetasve në kërkim: K. H, 57 vjeç, banues në fshatin Denas dhe dhëndrit të tij shtetasit E. I, 30 vjeç, banues në fshatin Lekas, Korçë. Dy shtetasit e lartpërmendur në bashkëpunim mes tyre, dyshohet të kenë kultivuar në zonën midis fshatrave Denas dhe Punmirë, bimë të dyshuara narkotike Cannabis Sativa, të cilat u gjetën dhe asgjësuan në vend me zjarr nga ana e Policisë, ku një pjesë e tyre u sekuestrua në cilësinë e provës materiale”, bëhet e ditur nga Policia. Nga ana tjetër, gjatë kontrollit të ushtruar në banesat e shtetasit K. H. dhe dhëndrit të tij, iu gjetën dhe sekuestruan në cilësinë e provës materiale katër armë gjahu me municion dhe municione luftarake pa lejen e organeve përkatëse, si dhe mjete të cilat përdoreshin nga dy të arrestuarit por dhe të afërm të tjerë të tyre, për prerjen e bimëve narkotike. dh. ç