Kina paralajmëron se do ndërhyjë në Hong Kong
Një zyrtar i lartë kinez, i ngarkuar me çështjet e Hong Kongut, paralajmëroi se Pekini do të ndërhynte nëse pushteti vendor do të dëshmohej i paaftë për të frenuar protestat e dhunshme. Ky është kërcënimi më i qartë i ndërhyrjes deri më sot nga qeveria qendrore në Kinë. Në një takim me përfaqësuesit e Hong Kongut në qytetin e afërt Shenzhen të mërkurën, zyrtari Zhang Xiaoming bëri një vlerësim të ashpër të situatës në terren, pas më shumë se dy muaj protestash. Ai e quajti situatën më të rëndë që kur Kina rinisi sovranitetin mbi Hong Kong, në 1997. “Nëse situata përkeqësohet më tej dhe ka trazira që qeveria e Hong Kongut nuk është në gjendje të kontrollojë, qeveria qendrore absolutisht nuk do të rrijë pa bërë asgjë”, tha Zhang, drejtor i Zyrës së Çështjeve të Hong Kongut dhe Macau të Këshillit të Shtetit të Kinës, në fjalimet e bëra nga media zyrtare shtetërore. Edhe pse nuk dha detaje, ai tha se qeveria qendrore ka mjaftueshëm opsione dhe fuqi për të shuar protestat shpejt. Protestat në Hong Kong nisën për shkak të një ligji ekstradimi në Kinë, që miratoi qeveria e Hong Kongut, i cili ka zemëruar masa të gjera popullore, të cilat janë ngritur kundër qeverisë. Edhe pse ligji u pezullua, ata kërkojnë dorëheqjen e qeverisë në protestat më masive që janë parë në Hong Kong prej vitesh. Pekini ka shprehur shqetësim se situata po del jashtë kontrollit dhe po sfidon sovranitetin e Kinës në atë territor. Hong Kongu është një ish- koloni britanike, që ka autonomi të limituar nën sundimin e Kinës. Paralajmërimi i Zhang për ndërhyrje nga Kina ishte më i drejtpërdrejti i bërë gjatë ditëve të fundit kur zyrtarët e bënë të qartë se durimi i Pekinit po humbiste në lidhje me këtë situatë. Një ditë para kësaj deklarate, qarkulloi një video nga Shenzen, ku 10,000 policë kinezë stërviteshin kundër trazirave. Megjithatë, ndërhyrja e Kinës me trupa në Hong Kong apo policë kundër trazirave, të sjellë nga pjesë të tjera të Kinës, do të sillte një reagim ndërkombëtar, do të dëmtonte besimin në rolin e këtij territori si qendër financiare dhe do të vinte në dyshim qëndrueshmërinë e tij.