Çmimet e shtëpive për 68 qytete me taksën e re
Zbardhet vendimi me çmimet e apartamenteve në gjithë vendin dhe taksa për 68 qytetet. Pensionistët dhe 9 kategoritë që do kompensohen. Dokumentet që duhen
Ndryshimi i mënyrës së taksimit të pronës ka ndikuar edhe te paratë, të cilat duhet të paguajë çdo familje në të gjithë vendin çdo muaj.
Me miratimin edhe në Tiranë të vjeljes së taksës nga Ujësjellësi, zyrtarizohet në të gjithë vendin taksa e re. Por sa do paguhet, sa kushton një metër katror apartament dhe sa është ndryshimi i taksës? Si llogaritet
Taksa e re nuk do të jetë fikse. Deri me miratimin e metodologjisë, taksimi ishte fiks. Në Tiranë, për apartamentet para 1993 ishte 15 lekë për metër/ katror, ndërsa për ato pas 1993 30 lekë për metër/ katror. Tashmë është e ndryshme. Taksa është 0.05 për qind e çmimit për metër katror. Sa është çmimi? Për këtë qeveria ka parashikuar dy mënyra. E para është çmimi i vendosur në kartelën e hipotekës. Pra, çmimi i blerjes së apartamentit apo i rivlerësimit të tij. ( Gjatë viteve të fundit pati dy amnisti, qeveria u ofroi qytetarëve rivlerësimin e çmimit të shtëpive me një taksë vetëm 1.5 për qind). Në rast se shtëpia është e rivlerësuar, për llogaritjen e taksës do të përdoret ky çmim. Por shumica e shtëpive nuk janë të rivlerësuara. Atëherë, për llogaritjen e taksës do të merren në konsideratë çmimet fiskale, të vendosura nga qeveria për çdo qytet. Gazeta boton sot këto çmime, për të 68 qytetet e vendit. Sa do llogaritet taksa e re për apartamentet e vjetra, para 1993 dhe ato të reja pas 1993. Sipas përllogaritjeve, më shumë taksë për pronën do të paguajnë ato qytete që kanë çmime fiskale më të larta, ndërsa në rrethet si Memaliaj apo Tepelenë, taksa do të jetë shumë e ulët.
Kush disponon një dyqan në rrethe, do të paguajë më pak taksa se një dyqan në Tiranë. Kjo, për shkak se çmimi i dyqanit do të llogaritet 1,5 herë më i lartë se çmimi i shtëpisë, kurse në Tiranë kjo llogaritet 2 herë më i lartë. Ndërsa për ndërtesat që përdoren për prodhim, përpunim apo magazinim të mallrave, taksa do të jetë 0,2 për qind e çmimit të magazinës. Sipas metodologjisë, çmimi i magazinës do të jetë sa 50 për qind e çmimit të sipërfaqes së banimit të zonës përkatëse, sipas qyteteve.
KUSH NUK PAGUAN
Janë 10 kategori që përjashtohen nga taksa. Qeveria e majtë është kujdesur që krahas pensionistëve kryefamiljarë dhe familjeve me ndihmë ekonomike, të përjashtojë edhe hotelet me 5 yje nga pagimi i taksës së ndërtesës. Gazeta boton të plotë parashikimin e ligjit për 10 kategoritë që nuk paguajnë taksë. Ndër më kryesorët, janë 130 mijë pensionistë që mbrohen nga taksa e shtëpisë. Këta të fundit duhet të vërtetojnë se janë të vetëm, pra, pa të ardhura të tjera në familje veç pensionit. I njëjti kusht i kësaj kategorie përdoret edhe për kompensimin e energjisë elektrike. Sipas përllogaritjeve, aktualisht janë 130 mijë pensionistë që përfitojnë 648 lekë si kompensim për energjinë dhe që nuk do të paguajnë taksën e re të shtëpisë. Se sa është kjo taksë, secili prej tyre, në bazë të qytetit ku jeton dhe sipërfaqes së shtëpisë, mund ta llogarisë sipas tabelës që boton sot gazeta.