Basha denoncon kasat fiskale: Prapa qëndron mafia kroate
“Mafia kroate dhe hajduti psikik do të fitojnë 10 milionë euro në vit”
Kryetari i Partisë Demokratike, Lulzim Basha, akuzoi dje qeverinë për vendimin për të ndryshuar kasat fiskale.
Në një postim në “Facebook”, Basha theksoi se qeveria ka parapërcaktuar fituesin e tenderit për sjelljen e programit elektronik, që do të bëjë monitorimin e xhirove ditore të bizneseve. Sipas Bashës, ky tender do t’i japë kryeministrit Rama dhe kompanisë kroate, që sipas tij është mafia kroate, një fitim prej 10 milionë eurosh në vit. “Tani, të gjithë e kuptojnë se një nga arsyet kryesore për dhunën e gjobave dhe sekuestrimeve kundër sipërmarrjeve të vogla që sigurojnë mbijetesën e shumicës së familjeve shqiptare, bëhet për të grabitur paratë e tyre dhe për të financuar hajdutërinë dhe luksin e hajdutit psikik dhe klientëve të tij milionerë. Tenderi 15 milionë euro i paracaktuar për miqtë e mafies kroate dhe familjarët e hajdutit psikik, është pjesa më e vogël e përfitimit. Mafia kroate dhe hajduti psikik do të fitojë 10 milionë euro në vit nga shitja e programit elektronik te bizneset”, theksoi kryedemokrati Basha. Në vijim të denoncimit, kryetari i Partisë Demokratike theksoi se nëpërmjet vendimit të marrë nga qeveria, biznesi do të duhet të paguajë një kosto shtesë vjetore për mirëmbajtjen e sistemit të ri të llogaritjes së xhirove të bizneseve në vend. “Për këtë po bëhet e gjithë lufta për faturimet e hajdutit psikik: që t’u imponojë bizneseve shqiptare blerjen e programit nga miqtë e mafies kroate në janar, kur hyn në fuqi detyrimi. Në janar, miqtë e mafies kroate në ortakëri me familjarët e hajdutit psikik do jenë të vetmit që do kenë gati programin për ta shitur me detyrim te bizneset, sepse çdokush tjetër nuk do ketë detajet teknike për ta ndërtuar. Praktikisht, miqtë e mafies kroate, hajduti psikik dhe familjarët e tij do të kenë monopolin. Hajduti psikik nuk do ndalet deri sa të vjedhë edhe pikën e fundit të mundit dhe gjakut të shqiptarëve. Edi Rama është kërcënim dhe rrezik për jetën dhe sigurinë e çdo familjeje shqiptare”, u shpreh Basha. Qeveria shqiptare ka miratuar një vendim, sipas të cilit do të bëhet ndryshimi i kasave fiskale në vend. Ky ndryshim do të hyjë në fuqi nga janari i vitit 2020. Sistemi parashikon instalimin e një programi, i cili do të operojë online për çdo pagesë që kryhet ndaj biznesit. Ky program mund të instalohet më kompjuter ose telefon dhe do të mundësojë edhe printimin e faturës fiskale. Kjo nismë e miratuar nga qeveria është cilësuar nga opozita si një taksë e re ndaj biznesit, e cila, sipas saj, varion nga 50 deri në 140 euro në vit.