Presidenti, kritika Bashës: Opozita të qëndrojë e bashkuar
Meta krahason Shqipërinë me opozitën serbe kundër Millosheviçit
Dita e djeshme e Presidentit Meta nisi me një kritikë ndaj Lulzim Bashës.
Qëndrimi i ndarë ndërmjet Bashës dhe pjesë tjetër të opozitës për sa i përket regjistrimit në zgjedhjet vendore të 13 tetorit, sipas dekretit të Metës, solli dje një reagim të drejtpërdrejtë të kreut të shtetit. Në një postim në faqen e tij në "Facebook", Meta nisi komentin e tij me shprehjen e shumëpërdorur ditët e fundit, "Zgjedhjet janë e vetmja zgjidhje". Sipas Presidentit, palët duhet të qëndrojnë në anën e ligjshmërisë, duke iu referuar në këtë mënyrë dekretit të tij për caktimin e datës 13 tetor për organizimin e zgjedhjeve vendore pasi, sipas kreut të shtetit, procesi zgjedhor i 30 qershorit është i paligjshëm sepse këtë datë ai e zhdekretoi. "Zgjedhjet janë e vetmja zgjidhje. Vetëm duke qëndruar në anën e ligjshmërisë dhe pjesëmarrjes në institucione, opozita mund të ndihmojë vendin, demokracinë, drejtësinë, por edhe vetveten", theksoi Meta. Ai bëri një krahasim të opozitës në Serbi kur kundërshtoi regjimin e Millosheviçit, duke theksuar se qëndrimi i bashkuar i opozitës serbe bëri çoi në largimin e tij nga qeveria. Duket se në mes fjalëve, kreu i shtetit heq një paralele ndërmjet regjimit të Millosheviçit në Serbi dhe atij në Shqipëri, pasi i bën apel opozitës shqiptare që të qëndrojë e bashkuar. "Nëse opozita në Serbi do të priste që Millosheviçi të dënonte Millosheviçin apo të garantonte zgjedhje të lira e të ndershme, pa dyshim që edhe sot e kësaj dite ai mund të ishte në pushtet po të mos i pushonte zemra. Por opozita mori vendimin më të drejtë, duke u bashkuar, duke u përballur me të dhe duke e mundur. Më pas i vuri prangat dhe e përcolli për në Gjykatën e Hagës. Ndaj, zgjedhjet janë e vetmja zgjidhje për demokraci dhe drejtësi", theksoi Presidenti. Në vijim të qëndrimit të tij, kreu i shtetit thekson se politika shqiptare duhet të bëjë çdo gjë për 18 tetorin, datë në të cilën do të mblidhet Këshilli i Ministrave të Bashkimit Europian dhe do të merret vendimi nëse Shqipëria do të kalojë klasën në vjeshtë për hapjen e negociatave apo do të presë vitin 2020 për të marrë një përgjigje tjetër. Meta e cilëson bashkëfajësi çdo argument që mund të jepet kundër zgjidhjes nëpërmjet zgjedhjes, duke kritikuar në këtë mënyrë edhe vetë kryetarin e Partisë Demokratike, i cili ka vendosur kushte të panegociueshme për Kryeministrin Rama; largimin e tij nga qeveria dhe krijimi i një qeverie tranzitore pa Kryeministër Ramën. "Çdo gjë tjetër është justifikim, alibi dhe bashkëfajësi! 18 tetori po afron", thekson kreu i shtetit. Kjo javë që po kalon ka qenë tepër intensive në aspektin mediatik të kreut të shtetit. Ndonëse është me pushime, ai ditët i ka nisur me qëndrime ndaj qeverisë dhe ndaj opozitës ku nuk kanë munguar edhe kritikat. Këto komente të përditshme në "Facebook", kreu i shtetit i ka shoqëruar me dekrete për kthime ligjshme për rishqyrtim, ku dje, prej tri ditësh, po kthen nga një nismë të miratuar nga Parlamenti.
"Nëse opozita në Serbi do të priste që Millosheviçi të dënonte Millosheviçin apo të garantonte zgjedhje të lira e të ndershme, pa dyshim që edhe sot e kësaj dite ai mund të ishte në pushtet