Rama: Partitë e kanë të pamundur verifikimin
"Pjetri nuk është kriminel, në administratë që me PD"
Kryeministri Rama reagoi dje sërish për rastin e Valdrin Pjetrit në Shkodër, i cili nuk kishte deklaruar në formularin e dekriminalizimit një vendim penal ndaj tij në shtetin italian për trafikim të lëndëve narkotike. Në rrjetet sociale, kreu i qeverisë theksoi se Valdrin Pjetri nuk është kriminel, por është e patolerueshme mosdeklarimi i së vërtetës në formularin e dekriminalizimit. "Valdrin Pjetri nuk është kriminel! Ai ka shërbyer në administratë si nëpunës korrekt qysh në kohën e qeverisjes së PD. Çfarëdo të ketë bërë 19 vjeç, nuk e bën kurrsesi njeriun një kriminel! Por fshehja e ngjarjes është e patolerueshme dhe pasojat për Shkodrën të pajustifikueshme", theksoi kreu i qeverisë duke shtuar se verifikimi i kandidatëve është i pamundur nga partitë politike. "Partitë nuk verifikojnë dot të dhëna individuale jashtë afateve të përcaktuara nga shtetet për dëshminë e penalitetit. Ato merren vetëm me kërkesë nga Policia ose Prokuroria", theksoi Kryeministri. Në vijim të argumenteve të tij, kreu i ekzekutivit shqiptare linçoi edhe nismë indirekte për ndryshimin e ligjit të dekriminalizimit. Historitë e herëpashershme të Partisë Socialiste me individë me rekorde kriminale duket se kanë sosur durimin e Kryesocialistit Rama, i cili theksoi se tanimë ka ardhur koha për të bërë ndryshime në ligj ku të vendosen afate verifikimi shtetëror dhe dënime penale në rast mosdeklarimi të së vërtetës në formularët e dekriminalizimit. "Koha të fusim në ligj afate verifikimi shtetëror të kandidaturave para regjistrimit të tyre në zgjedhje! Një kandidat që gënjen në mirëbesim dhe në formularin e vetëdeklarimit s'mund të lërë në baltë zgjedhësit dhe partinë që e ka besuar. Ai duhet të përjashtohet nga gara pa mundur të regjistrohet në zgjedhje dhe ta marrë të plotë gjithë përgjegjësinë e vetëdeklarimit të rremë. Jo vetëm kaq, po është koha të nisë verifikimi shtetëror i të gjitha vetëdeklarimeve të politikanëve e punonjësve të shtetit që kanë firmosur. Çdo vetëdeklarim i rremë duhet të sjellë përjashtim dhe dënim penal. Përgjegjësia individuale s'mund të ketë më asnjë fije kosto kolektive", u shpreh Kryeministri Rama në reagimin e tij të radhës për rastin e Valdrin Pjetrit në Bashkinë e Shkodrës.