Shiste kanabis me doza të vogla, arrestohet 19- vjeçari
Shiste kanabis në doza të vogla, arrestohet nga Policia e Tiranës një 19- vjeçar. I riu u arrestua gjatë ditës së djeshme në momentin që po shpërndante lëndë narkotike, ndërsa pas kontrolleve në banesën e tij janë gjetur edhe doza të tjera, të sekuestruara në cilësinë e provës materiale. “Vijojnë goditjet e njëpasnjëshme ndaj veprimtarisë kriminale të shpërndarjes së lëndëve narkotike në doza të vogla. Sekuestrohen 463 gramë lëndë narkotike Cannabis Sativa, e ndarë në doza gati për shitje. Në pranga poseduesi, njëkohësisht edhe shpërndarësi i lëndës narkotike”, njoftoi Policia. Operacioni u zhvillua nga Seksioni për Hetimin e Narkotikëve në Drejtorinë Vendore të Policisë Tiranë, në bashkëpunim me Sektorin e Forcës së Posaçme Operacionale, në bazë të informacioneve të siguruara në rrugë operative nga burime të ndryshme dhe u finalizua me arrestimin në flagrancë të shtetasit L. S., 19 vjeç, lindur në Tiranë. POLICIA Hetuesit kishin marrë informacione në rrugë operative se shtetasi L. S., në qytetin e Tiranës, kryesisht në rrugën “Dhimitër Shuteriqi”, i shiste lëndë narkotike kryesisht Cannabis Sativa, personave të ndryshëm, përdorues të lëndëve narkotike. Mbi bazën e këtyre informacioneve, u zhvillua operacioni “Muzgu” dhe pas vëzhgimit u bë arrestimi i shtetasit L. S., të cilit në momentin e kapjes iu gjetën një sasi dozash lënde narkotike Canabis Sativa, e gatshme për ta hedhur në treg. “Gjatë kontrollit në banesë, Policia ka gjetur edhe një sasi tjetër dozash me lëndë narkotike, gjithsej 463 doza me lëndë narkotike Cannabis Sativa, të futura në qese farmaceutike”, njoftoi Policia. Materialet hetimore janë referuar në Prokurorinë pranë Gjykatës së Shkallës së Parë Tiranë, për veprime të mëtejshme për veprën penale “Prodhimi dhe shitja e narkotikëve”.