Izolim për të fortët, gati rregullorja për zbatimin “41 Bis” në burgje
Ligji parashikon kufizimin e takimeve, ajrosjes dhe përdorimit të telefonatave apo vlerave monetare brenda në burgje
Me anë të një urdhri të datës 19 korrik, Ministria e Drejtësisë ka miratuar rregulloren e brendshme të Regjimit të Posaçëm të Sigurisë së Lartë në Burgje.
Miratimi i kësaj rregulloreje i hap rrugën aplikimit të sistemit të njohur edhe si “41 Bis”, që do të izolojë të dënuarit me rrezikshmëri të lartë, për t’i mbajtur ata larg kontaktit me botën e krimit jashtë. Lajmi për aplikimin e këtij sistemi u bë i ditur në janar të këtij viti nga vetë ministrja e Drejtësisë, Etilda Gjonaj, ndërsa gjatë kësaj kohe, është bërë e mundur përgatitja për funksionimin e tij. Zbatimi i ligjit pritet të nisë në shtator të këtij viti dhe deri më tani, janë rreth 150 të burgosur që do të izolohen. Më herët, me anë të një urdhri, ministrja Gjonaj, ka përcaktuar se dy burgjet që do të kenë regjim të posaçëm, janë burgu i Peqinit dhe ai numër 313 në Tiranë. Në këtë të fundit, përveç sektorit të Regjimit të Posaçëm, do të ketë edhe një sektor për bashkëpunëtorët e drejtësisë. Me ndryshimet e reja, burgu i konsideruar si i sigurisë së lartë, në FushëKrujë, do të kthehet në një burg të sigurisë së zakonshme dhe të burgosurit që vuajnë dënimin në këtë burg, do të transferohen. Më herët, ministrja Etilda Gjonaj, është shprehur se zbatimi i këtij regjimi është i nevojshëm në kushtet kur rezulton se elementët kriminalë që vuajnë dënimin në burgje, vijojnë të ruajnë lidhjet e tyre me jashtë.
IZOLIMI Duke iu referuar ligjit, personave të konsideruar me rrezikshmëri të lartë, do t’i kufizohen takimet, ajrosja dhe përdorimi i telefonatave apo vlerave monetare. Ligji parashikon se do të lejohet një takim familjar në muaj, i cili kryhet në intervale të rregullta kohore dhe në mjedise të caktuara, ku ndalohet hyrja e personave apo sendeve të tjera dhe që i nënshtrohen regjistrimit audio dhe video. Në raste të jashtëzakonshme, takimi me persona të ndryshëm nga familjarët, për personat e dënuar, kryhet me propozimin e drejtorit të institucionit dhe me miratimin e ministrit të Drejtësisë. Ndërsa për personat e paraburgosur, takimi me persona të ndryshëm nga familjarët kryhet vetëm me miratimin e prokurorit. Krahas kësaj, kufizimi parashikon se në rastet e mospasjes së takimeve, do të lejohet një telefonatë në muaj, me kohëzgjatje maksimale 10 minuta, e cila do të regjistrohet. Kryerja e kësaj telefonate do të bëhet vetëm me vendim të arsyetuar të drejtorit të Përgjithshëm të Burgjeve, kurse për personat e paraburgosur, ajo autorizohet me vendim të arsyetuar të prokurorit. Ligji parashikon edhe ndalimin e përdorimit të vlerave monetare, sendeve dhe objekteve që mund të marrë i dënuari ose i paraburgosuri nga jashtë, si edhe kontrollin e korrespondencës. Masa tjetër, që është parashikuar, është edhe reduktimi i qëndrimit në ajrim në mjedise të hapura për këtë kategori të burgosurish ose personash që janë në hetim dhe nën masën e arrestit me burg. Reduktimi i qëndrimit në ajrim në mjedise të hapura do të jetë më i kufizuar për këta persona, por jo më pak se një orë në ditë. Këta persona do të jenë gjithashtu të përjashtuar nga organet përfaqësuese të të dënuarve apo të paraburgosurve. Këto masa shtrënguese do të aplikohen për një vit për këta persona, duke i lënë të drejtën ministrit të Drejtësisë që ta zgjasë afatin edhe për më shumë.