Bllokohet “Lambo” i vjedhur në Gjermani, kushton 250 mijë euro
Arrestohet 38- vjeçari nga Elbasani, që trafikoi makinën luksoze
Një automjet luksoz me vlerë 250 mijë euro është sekuestruar dje nga Policia e Tiranës, që ka vënë në pranga personin e dyshuar për trafikimin nga Gjermania.
Makina model “Lamborghini Huracan” ishte deklaruar i vjedhur në shtetin gjerman më 30 korrik të këtij viti, ndonëse ky mjet kishte hyrë në Shqipëri më shumë se dy javë para se të njoftohej nga autoritetet. Burime zyrtare të Policisë thanë se kanë vënë në pranga një 38- vjeçar nga Elbasani, me banim në Shtutgart të Gjermanisë, si i dyshuar për kryerjen e veprave penale “Trafikimi i mjeteve motorike” dhe “Pastrimi i produkteve të veprës penale”. Ndërsa është bërë shpallja në kërkim për të njëjtat vepra penale për shtetasin B. M., 43 vjeç, banues në Gjermani, si bashkëpunëtor i të arrestuarit. Bllokimi i mjetit dhe arrestimi i të dyshuarit u realizua gjatë operacionit të koduar “Luxury cars”, për goditjen e veprimtarisë kriminale në fushën e trafikimit të mjeteve motorike.
OPERACIONI Operacioni “Luxury cars” u krye nga Seksioni për Hetimin e Trafiqeve të Paligjshme në Policinë e Tiranës, në bashkëpunim me Sektorin e Posaçëm “Shqiponja”. Seksioni për Hetimin e Trafiqeve të Paligjshme ka finalizuar me sukses operacionin, duke parandaluar dhe goditur një rast të trafikimit të mjeteve motorike, me qëllim shitjen e tyre në Shqipëri. Falë një pune të mirorganizuar nga burime të ndryshme operative, rezultoi se më datë 13.07.2019, në territorin e Shqipërisë ka hyrë nga një shtetas një automjet i tipit “Lamborghini Huracan”. Ky mjet, më datë 30.07.2019 është deklaruar i vjedhur nga shteti gjerman. Shërbimet e Policisë, pas kontrolleve të kryera, kanë konstatuar automjetin dhe menjëherë bënë bllokimin e tij. Në përfundim të veprimeve u bë arrestimi në flagrancë i shtetasit M. D., 38 vjeç, lindur në Elbasan dhe banues në Shtutgart, Gjermani, si i dyshuar për kryerjen e veprave penale “Trafikimi i mjeteve motorike” dhe “Pastrimi i produkteve të veprës penale”, ndërsa është shpallur në kërkim bashkëpunëtori i tij, 43vjeçari me inicialet B. M. “Ata dyshohet se kanë bashkëpunuar për kryerjen e vjedhjes së automjetit luksoz në Gjermani, me qëllim shitjen e tij në Shqipëri. Në cilësinë e provës materiale u sekuestrua automjeti tip ‘ Lamborghini Huracan’, i cili ka një vlerë monetare rreth 250 mijë euro”, tha zyrtarisht Policia.