Trupi i pajetë i një mashkulli ngec në rrjetat e peshkatarëve

Trupi pajetë i një personi të seksit mashkull është pikasur mëngjesin e së dielës nga peshkatarët durrsakë, rreth 4 milje larg bregut të detit. Kufoma e dekompozuar kishte rënë në rrjetat e peshkarexhës “Emiliano”, ekuipazhi i së cilës lajmëroi rojën bregdetare. Trupi i pajetë u përcoll drejt morgut të Spitalit të Durrësit, ku iu nënshtrua edhe ekzaminimeve të mjekëve ligjorë. Këta të fundit nuk konstatuan shenja dhune në kufomën e dekompozuar, duke lënë të kuptohet se nuk kemi të bëjmë me vrasje. Referuar informacionit zyrtar të Policisë, viktima ishte i veshur me rroba dhe me gjymtyrë shumë të dëmtuara, të dekompozuara nga lagështira. Nga ekspertiza mjeko- ligjore, kufoma rezulton e dekompozuar dhe duhet të ketë më shumë se një muaj në det. Dyshohet që ai të jetë mbytur, megjithatë nuk përjashtohet pista që të jetë vrarë dhe më pas të jetë hedhur në det për të humbur gjurmët. Kjo për shkak se, ndryshe nga informacioni zyrtar i sjellë nga Policia, burime jozyrtare bëjnë me dije se trupi i tij ka qenë i mbështjellë me natriban. Sipas një njoftimi të Policisë së Durrësit, anija ka ngritur rrjetat dhe ka konstatuar trupin e pajetë. Grupi hetimor ka nisur hetimet për të zbardhur të plotë ngjarjen. “Grupi hetimor nën drejtimin e Prokurorisë po vijon punën për sqarimin e rrethanave të ngjarjes”, thotë Policia në një njoftim paraprak për ngjarjen. “Më datë 18.08.2019, në orët e para të mëngjesit, një peshkarexhë që kishte dalë për gjueti rreth 4 milje larg Durrësit, duke ngritur rrjetat ka konstatuar në rrjeta një trup të pajetë të seksit mashkull. Kufoma është transportuar në morgun e spitalit për ekspertizë mjeko- ligjore. Nga ekspertiza e jashtme, trupi nuk ka qenë i lidhur apo i mbështjellë”, tha Policia. Nuk dihet nëse trupi i pajetë i përket ndonjë shtetasi shqiptar, apo rrymat e detit e kanë përcjellë kufomën nga vende të tjera fqinje.