"Ç’më tha Kadri Hazbiu mbëmjen e 18 dhjetorit ' 81"
Duro Shehu shprehet se e ka peng të madh që nuk mori pjesë në varrimin e të vëllait, Mehmetit, i urdhëruar nga ish- ministri i Mbrojtjes, Kadri Hazbiu. Në atë kohë, Duro ishte kreu i Komandës së Aviacionit Luftarak dhe sa u njoh me lajmin e kobshëm, u paraqit menjëherë në zyrën e ministrit të Mbrojtjes. Ai thotë se deri në vdekje nuk ka për ta harruar kurrë takimin me këtë të fundit, natën e mortit në zyrën e tij. "Ishin çastet e rënda kur sa isha njoftuar për tragjedinë e Mehmetit dhe kërkova të takohesha me Kadriun", kujton vëllai i ish- Kryeministrit më jetëgjatë të regjimit komunist. "Kadriu deri atëherë ishte një nga miqtë më të afërt të Mehmetit dhe mendoja se do më sqaronte me dashamirësi, por çuditërisht, këtë radhë takova një Kadri tjetër", shton Shehu i ngazëllyer. "Dëgjo Duro, - më tha, - ke ardhur për problemin e Mehmetit. Ai vrau veten për atë vajzën e Turdiut". Tani, - m'u drejtua, - lajmëro vëllezërit dhe shkoni në shtëpi te xhenazja. U thuaj se Partia nuk do ta varrosë. Është vetëvrarë e kjo do të thotë tradhti. Pastaj, me ato që ka bërë, mund të dalë se ka qenë armik". Desha t'i kërkoja diçka më shumë, por ishte e kotë. Atë çast Kadriu u çua në këmbë, hoqi syzet dhe m'u drejtua përmbledhtazi: "Është urdhër. Kështu duhet bërë. Mirupafshim!". Në largim e sipër më tha që unë, si komunist dhe kuadër me përgjegjësi, nuk duhej të merrja pjesë në varrimin që do të bëhej të nesërmen. Ndër momentet më dramatike të asaj ngjarjeje të rëndë, Shehu veçon detajet nga nata e mortit në shtëpinë e Mehmetit, ku bashkë me 12 familjarët e tij, ishin dhe 40 oficerë Sigurimi, që e gdhinë te trupi i pajetë në vilën kryeministrore të rrethuar me autoblinda dhe pushkatarë të maskuar, si në gjendje lufte.