Nga Soros te përgjimet e ‘ Bild’, Meta flet për krizën e zgjedhjet: Si u shmang përplasja civile
Përgjimet e “Bild”, Presidenti: Është e papranueshme që vitet e fundit nuk është bërë asnjë hetim i thelluar për këto ngjarje
Presidenti Meta dha një intervistë për gazetën italiane “Il Giornale”, ku iu përgjigj interesit të gazetarëve italianë mbi krizën politike në Shqipëri. Qysh në fillim, intervista nis me vendimin e Presidentit Meta për të anuluar 30 qershorin si datë zgjedhore, gjë që solli edhe ndryshimin e marrëdhënieve ndërmjet Ramës dhe Presidentit.
Kreu i shtetit thekson në intervistë se zgjedhjet e zhvilluara në 30 qershor nuk ishin as kushtetuese e as ligjore, pasi dekretet e tij mund t’i shqyrtojë vetëm Gjykata Kushtetuese. Krahas kësaj, kreu i shtetit bëri disa akuza ndaj Kryeministrit Rama, duke e cilësuar si shkaktarin e bllokimit të Gjykatës Kushtetuese në vend. Për sa i përket procesit zgjedhor të 30 qershorit, Presidenti theksoi se ato ishin zgjedhje si në sistemin komunist, pasi nuk pati asnjë rival dhe Partia Socialiste mori nën administrim të gjitha bashkitë e vendit. Presidenti u pyet nga gazetari italian mbi përgjimet e publikuara nga tabloidi gjerman “Bild”, ku dolën disa zyrtarë të lartë duke komunikuar me disa individë për çështje votash. Meta theksoi se është e papranueshme që nuk është bërë asnjë hetim i thelluar për ngjarjet e publikuara nga media gjermane. “Është një nga rastet më të rënda të funksionimit të shtetit të së drejtës, zhvillimi i zgjedhjeve të rregullta është zgjidhja kryesore për krizën aktuale”, ka theksuar ndër të tjera Presidenti Meta për çështjen e përgjimeve, duke shtuar se nevojiten masa më të forta për të zhdukur problemin e drogës dhe se fitimet nga ky aktivitet i paligjshëm janë më të mëdha në aspektin dimensional, në krahasim me Italinë apo me Gjermaninë. Gjatë intervistës, Presidenti foli edhe për akuzat që ai ka lëshuar ndaj Sorosit. Për këtë, kreu i shtetit ka theksuar se Shqipëria është një kombi i vogël dhe se duhen ruajtur interesat kombëtar për të mos përfunduar në duart e lojtarëve ndërkombëtarë privat.
President, pas vendimit tuaj për të shtyrë zgjedhjet lokale më 30 qershor dhe zgjedhjen e qeverisë për t’i realizuar ato, si kanë ndryshuar marrëdhëniet midis jush dhe Kryeministrit Edi Rama?
Nëse nuk do të kisha nxjerrë dekretin për të shtyrë zgjedhjet më 13 tetor, një datë jo e rastësishme, sepse më 18 tetor do të vendoset nga Bashkimi Europian për hapjen e negociatave të anëtarësimit për Shqipërinë dhe Maqedoninë e Veriut, do të ishte e pashmangshme një përplasje mes dy kampeve politike. Në një kohë që unë veproja sipas Kushtetutës, përgjegjësia e Kryeministrit ishte që ai nuk po e kuptonte se zgjedhjet e zhvilluara në këtë mënyrë ishin problem për negociatat me BE- në. Zgjedhjet e qershorit nuk ishin as kushtetuese, as ligjore, as legjitime, vetëm Gjykata Kushtetuese mund të kundërshtojë dekretin e Presidentit. Është për të ardhur keq që deri më sot, veprimtaria e Gjykatës është pezulluar me vullnetin e Ramës. Për të kuptuar parregullsinë e këtyre zgjedhjeve, mjafton të mendosh faktin se në të gjitha 61 bashkitë ku u zhvilluan votime, fituan socialistët sepse nuk kishin asnjë kundërshtar, si gjatë regjimit komunist. E keni seriozisht? Do t’ju them më shumë: jo vetëm që partia e Kryeministrit ka zgjedhur të gjithë kryetarët e bashkive, por edhe të gjithë anëtarët e këshillave bashkiakë, përfshirë edhe qytetin e Tiranës. Rezultati i pjesëmarrjes u shpall pas më shumë se njëzet ditëve dhe ishte zyrtarisht 23%, por në të vërtetë ishte më i ulët.
Disa javë para zgjedhjeve në 30 qershor, e përjavshmja gjermane “Bild” publikoi një seri përgjimesh për politikanët e Partisë Socialiste, zyrtarë të Policisë dhe elementë të krimit të organizuar, gjë që tregon se shumë marrëveshje ishin rezultat i shkëmbimit të votave, duke nxjerrë zbuluar një sistem korrupsioni shqetësues. Çfarë mendoni për këtë histori?
Është e papranueshme që vitet e fundit nuk është bërë asnjë hetim i thelluar për këto ngjarje. Është një nga rastet më të rënda të funksionimit të shtetit të së drejtës, zhvillimi i zgjedhjeve të rregullta është zgjidhja kryesore për krizën aktuale. Nevojiten masa të forta për të zhdukur problemin e drogës, fitimet që vijnë nga trafiku i drogës janë shumë më të larta në Shqipëri sa u përket dimensioneve të ekonomisë sonë, sesa në vendet më të mëdha si Italia apo Gjermania.
Kanë ngjallur debat edhe disa deklarata tuaja, ku denonconit influencën e Sorosit në Shqipëri. Cila është marrëdhënia midis “Shoqërisë së Hapur” dhe reformës së sistemit të drejtësisë shqiptar? Në ç’mënyrë ka ndikuar Sorosi?
Ne jemi një komb i vogël dhe duhet të jemi të kujdesshëm në një epokë globalizimi si kjo aktualja për të ruajtur vlerat që qëndrojnë në themelet e Shqipërisë, duke nisur nga identiteti ynë. Duhet të mbrojmë interesat tona kombëtare pa përfunduar në duart e lojtarëve ndërkombëtarë privatë. Unë nuk jam një populist, por një realist që dëshiron të mbrojë Shqipërinë.
Cili është statusi i procesit të anëtarësimit të Shqipërisë në Bashkimin Europian?
Unë besoj se anëtarësimi ynë në Bashkimin Europian është i nevojshëm, megjithëse progresi i bërë deri më sot nuk është shumë inkurajues. Ajo që më shqetëson më shumë është emigrimi me ritme të larta i të rinjve, është e nevojshme të krijohen perspektivat në të ardhmen për të rinjtë që vendosin të largohen nga Shqipëria. Çdo vit, dhjetëra, mijëra njerëz, largohen nga vendi ynë dhe nëse vazhdojmë kështu, do të përballemi me shpopullimin që ngjason me atë të viteve ‘ 90- të pas rënies së komunizmit. Nëse asokohe kjo gjë ishte e kuptueshme, sot nuk është më kështu, sepse duhen përgjigje efikase nga politika.
Është e papranueshme që vitet e fundit nuk është bërë asnjë hetim i thelluar për këto ngjarje. Është një nga rastet më të rënda të funksionimit të shtetit të së drejtës, zhvillimi i zgjedhjeve të rregullta është zgjidhja kryesore për krizën aktuale. Nevojiten masa të forta për të zhdukur problemin e drogës, fitimet që vijnë nga trafiku i drogës janë shumë më të larta në Shqipëri sa i përket dimensioneve të ekonomisë sonë, sesa në vendet më të mëdha si Italia apo Gjermania.