Po kalonin rrugën, makina përplas dy vajza në Korçë
Të plagosurat 19 e 10- vjeçare, në spital jashtë rrezikut
Tri aksidente kanë ndodhur gjatë ditës së djeshme në Korçë, me pasojë plagosjen e 7 personave. Aksidenti më i rëndë ndodhi gjatë orëve të pasdites në unazën e qytetit, ku një automjet përplasi dy vajza që po kalonin nga njëri krah i rrugës në tjetrin. Burime nga Policia e Korçës thanë se në unazën e qytetit, shtetasi I. B., duke drejtuar mjetin tip ' Nissan", dyshohet se ka përplasur dy shtetaset A. R., 19 vjeçe, dhe P. N., 10 vjeçe, ( këmbësore në rrugë), të cilat u dërguan për mjekim në Spitalin e Korçës, ku ndodhen jashtë rrezikut për jetën. Ndërsa drejtuesi i mjetit ndodhet i shoqëruar në ambientet e Komisariatit, ku po kryen veprimet e mëtejshme procedurale. Ndërkohë, më herët, një tjetër aksident kishte ndodhur në Maliq. Policia tha se specialistët e Sektorit të Policisë Rrugore referuan materialet në Prokurorinë e Korçës, për shtetasit Sh. B., 55 vjeç, banues në Fushë- Krujë, M. N, 40 vjeçe, banuese në Korçë. Procedimi ndaj tyre filloi pasi, në aksin rrugor Korçë- Pogradec, pranë fshatit Pirg, Maliq, duke drejtuar respektivisht mjetin tip "Hyundai" dhe mjetin tip "Volkswagen", janë përfshirë në një aksident, ku për pasojë janë dëmtuar dy drejtuesit e mjeteve, si edhe shtetasi M. M., 73 vjeç, banues në Fushë- Krujë, pasagjer në mjetin tip "Volkswagen", i cili së bashku me shtetasin Sh. G., u dërguan në Spitalin e Traumës në Tiranë për mjekim më të specializuar, jashtë rrezikut për jetën. Ndërsa shtetasja M. N., ndodhet në Spitalin Rajonal Korçë, jashtë rrezikut për jetën. Një tjetër aksident ka ndodhur edhe në Kolonjë, në aksin rrugor Ersekë- Korçë, pranë vendit të quajtur "Fushorja e Selenicës". Aty janë përplasur mjeti tip "Ford" me drejtues shtetasin H. M., me mjetin tip "Benz" me drejtues shtetasin G. M.. Për pasojë, janë dëmtuar drejtuesi i mjetit tip "Benz", shtetasi G. M., si dhe shtetasi M. C., pasagjer në këtë mjet, të cilët janë transportuar për mjekim në Spitalin e Korçës. Një tjetër aksident është regjistruar në autostradën Vlorë- Fier, në afërsi të fshatit Novoselë. Aty janë përplasur një automjet tip "Mercedez Benz", më një furgon të linjës Vlorë- Tiranë. Nga përplasja janë dëmtuar lehtë tre persona, mes të cilëve edhe një fëmijë. Të plagosurit janë dërguar drejt spitalit rajonal të qytetit të Vlorës ku edhe kanë marrë ndihmën e parë mjekësore. Mësohet se personat e lënduar më shumë kanë qenë të tronditur, ndërsa nuk kanë pasur probleme të rënda nga përplasja e dy mjeteve. Automjeti tip furgon ka pësuar dëme në pjesën e pasme të tij, ndërsa në vendngjarje kanë shkuar forcat e Policisë së Vlorës, të cilat kanë nisur hetimet për shkaqet e aksidentit. Dyshohet se shkaku kryesor i aksidentit të regjistruar në Novoselë të jetë shpejtësia e madhe e lëvizjes së mjeteve në këtë aks rrugor.