Jonuz: Jemi të motivuar, e mundim Tiranën
Mirsad Jonuz do të përjetojë të parën "klasike" në futbollin shqiptar, e megjithatë ai saktëson se ua di vlerën ndeshjeve të tilla. Gjatë konferencës së dhënë për mediat, një ditë para përballjes me Tiranën, trajneri i Vllaznisë shfaqet optimist për marrjen e një rezultati pozitiv dhe jep lajmin e mirë për rikuperimin e Behar Ramadanit. Starti i mbarë i ka dhënë qetësi maqedonasit dhe shpreson që në pushimin e Kombëtares të shkojnë me 7 pikë. Nuk kishte si të mos fliste edhe për merkaton, ndërsa paralajmëron se para mbylljes së "dritares" së transferimeve do të vijë edhe Godfrei Ualusimbi.
Vllaznia- Tirana është "klasikja" e futbollit shqiptar. A keni ju informacion se si përjetohet kjo nga tifozët?
Unë kam luajtur shumë derbi si futbollist dhe kam drejtuar disa të tilla si trajner. E di rëndësinë e madhe që ka ky takim edhe për Vllazninë apo tifozët. Ka shumë rëndësi përfundimi i këtij dueli, ndërkohë shoh edhe impaktin që kanë mediat vizive apo gazetat për këtë ndeshje. Ky takim i vlen për mirë futbollit shqiptar dhe na motivon më shumë për t'u përgatitur maksimalisht. Dua të theksoj se futbollistët e mi do të jenë të gatshëm, pasi disa kanë luajtur dhe e kanë përvojën. Vetë situata, grumbullimi i 4 pikëve, na jep të drejtë të jemi optimistë.
Në Shkodër kërkojnë fitoren. Ua premtoni shkodranëve këtë?
Të gjithë duan të gëzohen në fund të takimit. Do të ishte shumë bukur. Një zinxhir prej 3 ndeshjesh me 7 pikë do të ishte një start i shkëlqyer. Do të ketë mungesa apo rikthime në këtë takim? Skuadra është gati dhe e motivuar. Me përjashtim të Gligorovit, që është i dëmtuar, pjesa tjetër është OK. I gëzohem faktit se së bashku me ne do të jetë edhe Ramadani dhe Maranao ( Uenderson). Do të ketë minuta për Ramadanin? Kjo është me rëndësi për ne dhe ai do të ketë minutat e veta në këtë takim. Ka kaluar disa muaj i dëmtuar dhe tani është shumë mirë. Kjo është një mundësi e mirë për ne, pasi në mesfushë do të kemi mundësi të mira zgjedhjeje.
A do të vijë mbrojtësi afrikan që premtuat në merkato dhe a keni menduar ndonjë surprizë të fundit?
Çdo gjë është drejt finalizimit dhe ai do të jetë pjesë e Vllaznisë, para se të mbyllet zyrtarisht merkatoja. Procedurat janë në fund.