Arrestohet drejtori, LSI: S'është më kryetar i degës
Tavo: Histori e sajuar për lidhje të paligjshme energjie
Ish- drejtori i Agjencisë së Mirëqenies dhe Kujdesit Social në Gjirokastër, Armand Mamani, u vu në pranga për veprën penale "Shpërdorim detyre".
Sipas Policisë së këtij qyteti, prangosja e Mamanit është bërë pasi dyshohet se ai ka lejuar një subjekt të shfrytëzojë energjinë elektrike nga godina e AMKS Gjirokastër. Në pranga përfundoi gjithashtu shtetasja me inicialet L. B., 40 vjeçe, dhe u shpall në kërkim shtetasja me inicialet E. Zh., 53 vjeçe, banuese në Gjirokastër. Ato akuzohen për veprën penale "Vjedhje e energjisë elektrike". Nëpërmjet një njoftimi ditën e djeshme, Policia e Gjirokastrës sqaroi se arrestimi, ndalimi dhe shpallja në kërkim i shtetasve të mësipërm u bë pasi ish- drejtori Mamani i ka lejuar ato që të shfrytëzojnë energjinë elektrike të depos së AMKS Gjirokastër për biznesin e tyre. Sipas policisë, ish- drejtori i kishte të afërme shtetaset e mësipërme. Armand Mamani është i angazhuar në forcën politike Lëvizja Socialiste për Integrim në Gjirokastër.
REAGIMI Lëvizja Socialiste për Integrim përgënjeshtroi lajmet se Armand Mamani është kryetar i degës së LSI- së në Gjirokastër dhe se u prangos në kampin veror të organizuar nga LSI në Jalë. "Aktiviteti përmbyllës i kampingut të Jalës u mbajt mbrëmjen e 30 gushtit ku foli kryetarja e LSI- së, Monika Kryemadhi. Largimi i të rinjve nga kampi ka nisur më 31 gusht, nga ora 09: 00. Përhapja e këtyre lajmeve është thjesht një tentativë e dështuar e Rilindjes për të devijuar vëmendjen e opinionit publik me lajme të rreme nga realiteti i demaskimit të kriminelëve klientë të saj", shkruhet në njoftimin e LSI- së. Ndërsa ish- deputeti i LSI- së në Gjirokastër, Vangjel Tavo, reagoi nëpërmjet një postimi në "Facebook", duke e cilësuar ngjarjen si të sajuar politikisht nga kryetari i ri i bashkisë së këtij qyteti që doli nga zgjedhjet e 30 qershorit, Flamur Golemi: "I kompleksuar me rekordin e votave më të ulëta, ky gaztor ( kryetari i Bashkisë së Gjirokastrës) nisi shkarkimet politike. Armand Mamani, drejtor i Agjencisë së Mirëqenies dhe Kujdesit Social u përball ditën e dytë të punës së kryetarit gaztor me një audit të befasishëm kontrolli, i cili nuk gjeti asnjë shkelje. Ndërkohë, u sajua një histori e turpshme për lidhje të paligjshme energjie elektrike", shkruan Tavo në "Facebook".