Xhafaj: Palmer, kontribut për Reformën në Drejtësi

“Lajm shumë i mirë jo vetëm për Shqipërinë, por për gjithë rajonin”

Ish- ministri i Brendshëm, Fatmir Xhafaj, uroi Matthew Palmer në detyrën e re, duke u shprehur optimist se ish- zv/ ndihmës Sekretari amerikan do të kontribuojë shumë në instalimin e Reformës në Drejtësi. Zyrtari i Lartë i Shteteve të Bashkuara të Amerikës, Matthew Palmer, ka marrë një detyrë të rëndësishme, teksa do të jetë Përfaqësuesi i Posaçëm i SHBA- ve për Ballkanin Perëndimor. Xhafaj, shprehet optimist se ish- zv/ ndihmës Sekretari amerikan do të kontribuojë shumë në instalimin e Reformës në Drejtësi, intensifikimin e luftës kundër korrupsionit dhe krimit të organizuar në Shqipëri. “Caktimi i Matthew Palmer si Përfaqësues i Posaçëm për BP është një lajm shumë i mirë jo vetëm për Shqipërinë, por për të gjithë rajonin, për forcimin e bashkëpunimit, dialogut dhe sigurisë rajonale. Faleminderit Departamentit të shtetit për rritjen e vëmendjes për rajonin dhe për Shqipërinë në këto momente kritike”, shkruan Xhafaj në një status të tij në “Twitter”. Ish- drejtuesi i Reformës në Drejtësi, Xhafaj shprehet i bindur se prezenca e Palmer në Ballkan do të konsolidojë shtetin e së drejtës. “I bindur se kontributi i z. Palmer në Shqipëri do të vijë duke u forcuar veçanërisht për konsolidimin e shtetit të së drejtës dhe Reformës në Drejtësi, luftën kundër korrupsionit dhe krimit të organizuar. Ka qenë kënaqësi e veçantë të ndaj me të shqetësimin për këto tema gjatë vizitës sime në Washington, në mars 2018 dhe të shoh tek ai interesimin dhe kujdesin e veçantë për integrimin e shpejtë në Bashkimin Evropian të Shqipërisë. Suksese z. Palmer në këtë mision shprese për rajonin, për vendin tim”, shkruan Xhafaj në rrjetet sociale. Dy ditë më parë, Sekretari i shtetit, Mike Pompeo, ka emëruar zëvendësndihmës Sekretarin, Matthew Palmer, si përfaqësuesin e tij të Posaçëm për Ballkanin Perëndimor. “Në këtë rol, tha Departamenti i Shtetit, zoti Palmer do të udhëheqë përpjekjet tona për të forcuar angazhimin diplomatik amerikan në mbështetje të paqes, stabilitetit dhe begatisë në rajon dhe për t’u përqendruar në integrimin e vendeve të Ballkanit Perëndimor, në institucionet perëndimore”. Në detyrën e zëvendësndihmës Sekretarit të shtetit për Çështjet e Evropës dhe Euroazisë, Matthew Palmer ka shprehur që herët shqetësim për mungesën e Gjykatës Kushtetuese dhe Gjykatës së Lartë në Shqipëri. “Ajo që na shqetëson është se nuk ka Gjykatë të Lartë. Ne do të dëshironim që Gjykata të konstituohej. Mendojmë se është shumë e rëndësishme që çdo sistem të ketë kontrollet dhe ekuilibrat e duhur, në mënyrë që të ketë përgjegjshmëri, transparencë dhe respekt për sundimin e ligjit. Ne ia kemi shtruar këto çështje Kryeministrit Rama, siç kemi bërë me paraardhësin e tij dhe siç do të bëjmë edhe me pasardhësin e tij. Kjo është shumë e rëndësishme për Shtetet e Bashkuara, është e rëndësishme për Shqipërinë dhe për popullin shqiptar. Është gjithashtu e rëndësishme për rajonin”, është shprehur Palmer për “Zërin e Amerikës”. Gjithashtu, ai ka sqaruar se pozicioni që mbajnë SHBA- të nuk shkon në favor të Kryeministrit Rama. “Ne nuk po mbështesim Kryeministrin Rama. Shtetet e Bashkuara nuk po mbajnë anë në mosmarrëveshjet politike të Shqipërisë. Ajo që ne po mbështesim është sundimi i ligjit, mbështesim institucionet shqiptare. Dhe ne do të dëshironim që mosmarrëveshjet politike në Shqipëri të zgjidheshin përmes këtyre institucioneve e jo përmes ndërhyrjeve nga jashtë”, është shprehur Palmer.