“Daily Mail”: Ravik Gurra u vra për një çështje gjyqësore në Shqipëri
ELBASAN – Avokati i njohur, Ravik Gurra, është vrarë pasi humbi një çështje të rëndësishme gjyqësore. Kështu shkruan gazeta britanike “Daily Mail”, duke iu referuar hetimeve për vrasjen e ndodhur para tre muajve në Elbasan. 50- vjeçari me nënshtetësi britanike u qëllua tri herë në kokë me një stil ekzekutimi mafioz. “Një avokat britanik, që përfaqësonte një gangster shqiptar në gjyq, u qëllua për vdekje, duke ngjallur dyshime se ekzekutimi i tij erdhi pasi humbi disa çështje gjyqësore me profil të lartë kriminal”, thuhet në shkrimin e gazetarëve Jake Ryan dhe John Lucas. Autori përdori një pistoletë me silenciator në momentin e vrasjes, ndërsa Gurra ndodhej i ulur në një kafe bashkë me miq të tij në qendër të qytetit të Elbasanit. Valët tronditëse të vrasjes u përhapën deri në Heartfordshire, vendin ku jeton bashkëshortja e tij, Nina, bashkë me dy vajzat adoleshente. Gurra, i cili më parë ka punuar në Home Office ( ministrinë e Brendshme britanike) si përkthyes, ka përfaqësuar disa mafiozë shqiptarë, mes të cilëve dhe anëtarë të familjes bandite Çapja, por kishte humbur një çështje. Në nëntor, ai përfaqësoi Emiljano Shullazin, i cili u shpall fajtor për gjobëvënie dhe drejtim të një organizate kriminale, duke u dënuar me 14 vite burg. Nuk ka asnjë provë se Shullazi është përfshirë në vrasjen e Gurrës. Një avokat shqiptar, që nuk dëshiron të identifikohet, i ka thënë “Daily Mail”: Vrasësi i Ravik Gurrës u çoi një mesazh të gjithë avokatëve të kriminelëve. Nuk jemi të sigurt kur përfaqësojmë një kriminel. Kriminelët veprojnë përtej kufijve. Nëse vrasin një avokat në Shqipëri se humbi një çështje, ata mund të vrasin dhe në Gjermani e Angli gjithashtu”. Autorët e vrasjes së ndodhur në mars, pas ekzekutimit, dogjën makinën që përdorën për t’u larguar. Deri tani nuk ka asnjë të arrestuar për ngjarjen. Një burim i Policisë i ka thënë “Daily Mail” se ka dy pista. E para ka të bëjë me ndëshkimin ndaj Gurrës për humbjen e një çështjeje gjyqësore dhe e dyta është se mund të jetë vrarë nga rivalët e grupit Çapja. “Pas kësaj vrasje ka një urrejtje për humbjet ligjore. Dihet se Ravik Gurra ishte i afërt me Çapjat dhe i lidhur me anëtarë të bandës në Britani dhe ata në Shqipëri. Vrasja mund të jetë bërë dhe nga rivalët e tyre për t’i dërguar një mesazh”, thotë burimi i Policisë. Ravik Gurra emigroi në Britaninë e Madhe në vitet 1990, ku martua me një grua britanike, duke marrë kështu dhe nënshtetësinë. Fqinjët e tij në Britani e përshkruajnë 50vjeçarin si një person miqësor dhe familjar. “Ai gjithmonë vinte për të biseduar dhe flisnim shpesh për futbollin”, shprehet njëri prej fqinjëve.