Si mund të jetojmë së bashku? Hapet gara për Bienalen e Venecias
Si mund të jetojmë në një hapësirë të përbashkët, pavarësisht individualitetit, kufijve politikë, besimeve, kulturës...? Në kohërat e globalizimit, kur kufijtë po kthehen gjithnjë e më tepër në koncepte të lëvizshme, kur emigracioni dhe migracioni janë në vitet e tyre më të bujshme, njerëzve nuk u mbetet veçse të bashkëjetojnë me njëri- tjetrin, pavarësisht prejardhjes. Nga ana tjetër, parë në një këndvështrim më të ngushtë, çdokush është i detyruar t'u nënshtrohet normave të shoqërisë, pavarësisht dëshirës së natyrshme për të qenë i lirë. Të gjitha këto janë pikëpyetje, me të cilat shoqëria moderne përballet çdo ditë. "Si mund të jetojmë së bashku?" Këtë pyetje ngre edhe edicioni i 17 i Bienales Ndërkombëtare të Arkitekturës në Venecia. Në kuadër të këtij aktiviteti, Ministria e Kulturës, me cilësinë e komisarit të pavijonit shqiptar, ka shpallur thirrjen për paraqitjen e projektit për pavijonin shqiptar në Bienalen e Arkitekturës që do të jetë e hapur për publikun më 23 maj - 29 nëntor 2020, me temë: "How will we live together". Tema e kësaj bienaleje është përzgjedhur nga kuratori i edicionit të 17, Hashim Sarkis, sipas të cilit: "Kemi nevojë për një kontratë të re hapësinore. Në kontekstin e thellimit të ndarjeve politike dhe rritjes së pabarazive ekonomike, arkitektëve i kërkohet të imagjinojnë hapësira në të cilat mund të jetojmë së bashku: si qenie njerëzore të cilat, pavarësisht nga individualiteti, dëshirojnë të lidhen me njëri- tjetrin dhe me qenie të tjera në botën reale dhe digjitale; si familje të reja që kërkojnë hapësira më të larmishme dhe dinjitoze për të banuar; si komunitete në zhvillim që kërkojnë barazi, përfshirje dhe identitet hapësinor; përtej kufijve politikë për të imagjinuar gjeografi të reja; si një planet që po përballet me krizat që kërkojnë veprim global për ne, që të vazhdojmë të jetojmë".
Ministria e Kulturës hap thirrjen për projekt- ide të frymëzuara nga një vëzhgim i kujdesshëm i arkitekturës bashkëkohore dhe i shoqërisë shqiptare, sidomos aty ku kjo bën ndryshimin, si dhe mjetet vizuale, përmes së cilave ato do t'i komunikohen publikut të gjerë dhe profesionistëve.
Ky edicion i Bienale do të kërkojë të konfirmojë ndër të tjera idenë se pikërisht në sajë të veçantisë materiale, hapësinore dhe kulturore të saj, arkitektura frymëzon mënyrat e ndryshme të të jetuarit së bashku. Në këtë mënyrë, pjesëmarrësit e edicionit të 17 duhet të nxjerrin në pah ato aspekte të temës kryesore që në thelb janë arkitektonike.
KRITERET
Kandidatët preferohen të jenë studio arkitekturore apo ekipe multidisiplinare, të cilat kanë në përbërje të tyre arkitektë ( drejtues i grupit), artistë, graphic designer, kritikë arti, artizanë, sociologë urbanë, planifikues urbanë etj.; të dëshmojnë njohuri të mira mbi arkitekturën shqiptare; të kenë përvojë kombëtare dhe ndërkombëtare në fushën e arkitekturës, urbanistikës dhe peizazhit e cila do të dëshmohet përmes portofolave të punimeve. Mund të jenë shqiptarë apo të huaj.
Kandidati duhet të jetë i aftë të kryejë studimin dhe të zhvillojë konceptin origjinal të shoqëruar me një rrëfim kuratorial koherent; të hartojë projektin kuratorial të integruar për pavijonin shqiptar në Bienale, së bashku me gjithë përmbajtjen e ekspozitës përfshirë këtu fotografi, instilacione, modele dhe material të shkruar për panelet e ekspozitës; të hartojë programin kulturor që do të shoqërojë pavijonin shqiptar përgjatë kohëzgjatjes së Bienales; të realizojë kurimin, zbatimin dhe menaxhimin e plotë të projektit.
Ministria e Kulturës inkurajon të gjithë kandidatët të bashkëpunojnë me kuratorë vendas dhe/ ose të huaj që kanë përvoja respektive në organizime dhe pjesëmarrje në evente të ngjashme.
PËRZGJEDHJA DO TË KALOJË NËPËR DY FAZA:
Faza I: është faza e përzgjedhjes së projekt- ideve më të mira. Kjo fazë është e hapur deri më 20 tetor 2019, ora 24: 00. Shpallja e fituesve të fazës I: Juria do të bëjë përzgjedhjen e 3 projekt- ideve më të mira, që do të kualifikohen për në fazën e dytë të konkursit, brenda datës 25 tetor 2019. Faza II: është faza e paraqitjes së projekteve të plota të pavijonit shqiptar në Bienale mbi projektidetë e kualifikuara në fazën e parë. Këto projekte duhet të paraqiten deri në datën 8 dhjetor 2019, ora 00: 00. Juria do të shpallë kërkesat mbi paraqitjen e projektit të plotë menjëherë pas shpalljes së fituesve të fazës së parë. Shpallja e fituesit: Projekti dhe ekipi fitues do të shpallet brenda datës 13 dhjetor 2019.