Ruçi bën gati festën për 75- vjetorin e Çlirimit: Meritë e partizanëve
Përplasja me ballistët
Parlamenti i Shqipërisë nisi sesionin e ri parlamentar, ndërsa në fjalën hapëse të këtij sesioni, kryetari i Kuvendit, Gramoz Ruçi, vlerësoi punën e institucionit që drejton në përballjet e pazakonta politike që janë zhvilluar në të. "Kuvendi përballoi me dinjitet sfida të jashtëzakonshme dhe unike", tha Ruçi, ndërsa shtoi se Kushtetuta u rezistoi aventurave, duke shpëtuar kështu sistemin demokratik të Shqipërisë nga anarkia dhe kaosi". Sipas tij, Kuvendi i Shqipërisë ka funksionuar me "kuorum kushtetues e shumicë të kualifikuar për të miratuar çdo akt ligjor". Kreu i Kuvendit tha ndër të tjera se "Dora e shtrirë e Kuvendit për opozitën jashtë tij nuk është mëshirë e ' djalit plëngprishës', por harmonizim i konstitucionalizmit, si element thelbësor i përhershëm i demokracisë, me kompromisin politik, si gjendje e përkohshme e saj". Ai nuk la pa përmendur dhe festimet për 75- vjetorin e çlirimit të atdheut dhe iu kërkoi deputetëve që të bëhen pjesë aktive e tyre. "Çlirimi i Shqipërisë është meritë e partizanëve shqiptarë, Ushtrisë dhe Luftës Antifashiste Nacionalçlirimtare. Pa Ushtrinë partizane dhe Luftën e saj, ndjenjat dhe rezistenca antifashiste shqiptare do të ishin asgjësuar nga bisha nazifashiste", u shpreh Ruçi gjatë fjalës së tij.
GRAMOZ RUÇI
Kuvendi mbylli sesionin e kaluar dhe fillon sesionin e ri si një institucion funksional, me kuorum kushtetues e shumicë të kualifikuar për të miratuar çdo akt ligjor. Kjo, edhe në sajë të përgjegjësisë kombëtare, kushtetuese e politike të deputetëve të rinj të opozitës, të cilët meritojnë mirënjohjen e shoqërisë e qytetarëve. Kuvendi përballoi me dinjitet sfida të jashtëzakonshme dhe unike. Demokracia liberale, si asnjëherë gjatë tri dekadave, u provua si demokraci kushtetuese dhe vetë konstitucionalizmi si themeli solid i saj. Si asnjëherë në historinë e pluralizmit, Kushtetuta u rezistoi aventurave dhe parimi i Manja Kartës "Liri nën Ligj" shpëtoi sistemin demokratik e Shqipërinë nga anarkia e kaosi.
Reforma në Drejtësi ishte argumenti më bindës për rekomandimin pozitiv të Komisionit Europian për hapjen pa kushte të negociatave. Gjatë sesionit të kaluar përmbyllëm detyrimet për miratimin e 30 akteve të Reformës në Drejtësi, me miratimin e 2 ligjeve e 1 vendimi, në zbatim të vendimeve të Gjykatës Kushtetuese për funksionimin e Inspektorit të Lartë të Drejtësisë, Këshillit të Lartë Gjyqësor e Këshillit të Lartë të Prokurorisë.
* * *
Dëshira e të gjithëve ne, por ç'është më e rëndësishmja, dëshira e të gjithë shqiptarëve, është çelja e negociatave. Qytetarët janë me mendje e zemër në 17- 18 tetorin e këtij viti dhe ne duhet ta përdorim këtë fillimsesioni për të kompensuar çka nuk mundëm gjatë sesionit të kaluar. Prandaj, prioriteti i parë do të jetë përmbyllja e Reformës Zgjedhore dhe përfshirja e rekomandimeve të OSBE- ODIHR, përfshirë rekomandimet e zgjedhjeve të 30 qershorit. Reforma Zgjedhore do të jetë një produkt konsensual i Kuvendit edhe me opozitën jashtëparlamentare.
Dora e shtrirë e Kuvendit për opozitën jashtë tij nuk është mëshirë "djalit plëngprishës", por harmonizim i konstitucionalizmit, si element thelbësor i përhershëm i demokracisë, me kompromisin politik, si gjendje e përkohshme e saj. Mbrojtja e Kushtetutës sot është garancia e Shqipërisë nesër. Planin e Veprimit të Kuvendit për Integrimin për zbatimin e rekomandimeve të dhëna për Kuvendin në Raportin 2019 të Këshillit Europian do ta miratojmë brenda shtatorit. Reforma në Drejtësi do të vazhdojë, duke synuar përfundimin e ngritjes, plotësimit dhe bërjes funksionale të institucioneve të reja të qeverisjes së sistemit, raportimin e tyre në Kuvend e mbështetjen me burime njerëzore, financiare e materiale, sipas nevojave. Gjykata Kushtetuese dhe Inspektori i Lartë i Drejtësisë do të zgjidhen e bëhen funksionale shumë shpejt. Do të rishikojmë ligjin mbi rolin e Kuvendit për integrimin, për të krijuar një mekanizëm të ri për mbikëqyrjen e punës së qeverisë gjatë negociatave. Fuqizimi i funksionit ligjvënës të Kuvendit do të vazhdojë, duke orientuar Qeverinë drejt përgatitjes me përparësi të ligjeve që mbështesin zhvillimin, mirëqenien dhe mbrojtjen shoqërore për qytetarët.
* * *
Në këtë sesion do të kremtojmë 75- vjetorin e çlirimit të atdheut, ngjarje monumentale e historisë sonë kombëtare.
Çlirimi i Shqipërisë është meritë e partizanëve shqiptarë, Ushtrisë dhe Luftës Antifashiste Nacionalçlirimtare. Pa Ushtrinë partizane dhe Luftën e saj, ndjenjat dhe rezistenca antifashiste shqiptare do të ishin asgjësuar nga bisha nazifashiste.
Lufta jonë Nacionalçlirimtare, ashtu si Lufta e Dytë Botërore, nuk u fitua si përplasje idesh, por në beteja të përgjakshme në malet, detet, qiejt dhe qytetet e Globit, në të cilat ranë dhjetëra miliona ushtarë e luftëtarë. Ushtria Nacionalçlirimtare luftoi denjësisht në krah të Ushtrisë së Kuqe, Marinës e Flotës Amerikane, Ushtrisë e Flotës Britanike dhe ishte kjo luftë që e vendosi Shqipërinë në anën e duhur të historisë. Gjatë gjithë këtij viti, unë kam ndjekur me vëmendje, kam marrë pjesë ose kam përshëndetur pothuajse të gjitha ngjarjet e rëndësishme të Luftës. Me këtë rast, ju bëj thirrje të gjithëve ju, kolegë deputetë, që të merrni pjesë aktivisht në përkujtimin e ngjarjeve të Luftës dhe të çlirimit në të gjithë territorin e vendit.