Balla: Nuk e verifikonim dot Pjetrin, të punojmë për të forcuar ligjin
Numri dy i Partisë Socialiste, Taulant Balla, e ka hequr përgjegjësinë nga partia që ai aderon dhe ia ngarkon atë ligjit, sa i përket problemit të verifikimit të figurës së kandidatëve për kryetar bashkie dhe deputet. Referuar rastit të Bashkisë së Shkodrës, ku kandidati Valdrin Pjetri dha dorëheqjen pa u betuar si kryebashkiak, pasi Partia Demokratike publikoi dokumentet ku ishte i dënuar në Itali shumë vite më parë, Balla u shpreh se PS nuk kishte mundësi Verifikimi. Për të krijuar këtë mundësi, numri dy i PS- së u shpreh se vetë Kryeministri Edi Rama, në cilësinë e deputetit, ka përgatitur një amendament që ka të bëjë me shtrëngimin e domosdoshëm lidhur me verifikimin e pastërtisë së figurës. “Rasti i Shkodrës është një rast i cili na bën të vetëdijshëm që kuadri ligjor ekzistues nuk është ende i plotë. Në këtë këndvështrim, Kryeministri, z. Edi Rama, më shumë në cilësinë e deputetit, sesa atë të Kryeministrit, do të depozitojë në Komisionin e Reformës Zgjedhore si amendamente, shtrëngimet e domosdoshme dhe më të ashpra lidhur me pastërtinë e figurës së çdo kandidati”, u shpreh Balla nga foltorja e Parlamentit. Kreu i Grupit Parlamentar i Partisë Socialiste ftoi edhe aktorët e tjerë politikë që të japin kontributin e tyre për forcimin e ligjit të kontrollit të figurës së kandidatëve. “Le të jetë Komisioni i Posaçëm i Reformës Zgjedhore ai që të shqyrtojë të gjithë këto propozime, me qëllim që së bashku me ju të mund ta pasurojë këtë nismë të vyer, në funksion të parandalimit të çdo personi me të shkuar problematike”, u shpreh Balla. Reagimi i numrit dy të PS- së erdhi pasi, pas përfundimit të zgjedhjeve të 30 qershorit, Partia Demokratike ka denoncuar dy kandidatë bashkisë së maxhorancës. Rasti i Parë ishte ai i Valdrin Pjetrit në Shkodër. PD- ja publikoi dokumente autentike se Valdrin Pjetri, mbi një dekadë më parë, ishte arrestuar dhe dëbuar nga Italia, shteti ku Pjetri ka kryer studimet. Ndërkohë, ky i fundit nuk e kishte deklaruar këtë ngjarje në formularin e vetëdeklarimit për pastërtinë e figurës. Opozita vijon denoncimet për një tjetër kryetar bashkie të maxhorancës. Sipas PD- së, kryebashkiaku i Vorës, Agim Kajmaku, ka qenë i arrestuar në Greqi me emrin Alias Jorgo Toto për falsifikim parash.