KLP miraton buxhetin, 411 milionë lekë për 3 vite
Gjatë vitit 2020, Këshilli pritet të bëjë investimet më të mëdha
Këshilli i Lartë i Prokurorisë miratoi dje buxhetin afatmesëm duke caktuar për vitin 2020 një shumë totale prej 230 milionë e 724 mijë lekësh.
Kjo shumë do të jetë e ndarë, për pagat, investimet dhe shpenzimet operative që do të ketë ky institucion. Për vitin 2021, KLP do të ketë një buxhet më të ulët, që kap shifrën e 165 milionë lekëve. Gjatë këtij viti, Këshilli pret që të mos ketë shpenzime për investime të mundshme, edhe për vitin 2022 pritet gjithashtu që të ketë një buxhet më të vogël se ai i vitit 2020, por më të lartë se 2021. “Këshilli bëri shqyrtimin e projekt– vendimit për miratimin e rishikimit të projekt- buxhetit afatmesëm 2020- 2022( faza teknike) të Këshillit të Lartë të Prokurorisë. Këshilli ka pasur në dispozicion relacionin dhe projekt- vendimin për miratimin e projekt- buxhetit afatmesëm 2020- 2022 të Këshillit të Lartë të Prokurorisë, hartuar nga Komisioni i Planifikimit Strategjik, i Administrimit dhe Buxhetit dhe pasqyrat financiare shpjeguese”, njoftoi dje KLP.
BUXHETI Sipas vendimit të Këshillit të Lartë të Prokurorisë, mësohet se gjatë vitit 2020, do t’i duhet një shumë prej 120 milionë vetëm për pagat dhe sigurimet. Vlerë e cila është parashikuar e njëjtë edhe në dy vitet e tjera. 30 milionë janë parashikuar për shpenzime operative të këtij institucioni, për secilin vit. Ndërkohë, KLP ka parashikuar që gjatë vitit 2020 të bëjë 80 milionë e 724 mijë lekë investime, vlerë e cila do të ulet në vitin 2021 në 15 milionë dhe në vitin 2022 në 10 milionë.
KLP Që pas konstituimit në datën 20 dhjetor 2018 të Këshillit të Lartë të Prokurorisë, ky institucion ka pasur probleme me ambientet, stafin dhe infrastrukturën, i cili është duke u rekrutuar. Aktualisht, KLP i bën mbledhjet në ambientet e ish- Këshillit të Lartë të Drejtësisë, ndonëse është inauguruar edhe ndërtesa e quajtur “Poli i Drejtësisë” ku pritet të vendoset institucioni. Do të duhen disa investime të tjera për ta bërë këtë ndërtesë, “shtëpinë” e Këshillit, investime të parashikuara për t’u bërë me buxhetin e vitit 2020.