Gjermani, rritet mbështetja për ekstremin e djathtë
Në votimet vendore të shteteve në Gjermani, partia ekstremiste e djathtë, “Alternativa për Gjermaninë’ ( AfD) ka shënuar rritje të konsiderueshme të mbështetjes, siç pritej, por nuk ka dalë forcë e parë për të marrë drejtimin në lande tradicionalisht të udhëhequra nga konservatorët apo socialdemokratët. Të dielën u votua në Saksoni dhe Brandenburg, ku sërish në vend të parë në Saksoni u rendit CDU dhe në Brandenburg socialdemokratët, e megjithatë në krahasim me zgjedhjet e kaluara, mbështetja për ekstremin e djathtë që është kundër emigracionit dhe kundër një pjese të mirë të politikave të BE- së, është rritur me më shumë se dyfishin. Demokristianët e Kancelares gjermane, Angela Merkel, humbën vota në Saksoni, morën 32 për qind të mbështetjes, përpara AfD- së që mori 27.5 për qind. Në Brandenburg, Partia Social Demokrate e qendrës së majtë fitoi 26.2 për qind të votave, ndërsa AfD- ja 23.5 për qind. Rritjen më të madhe, AfD- ja e ka shënuar në Saksoni, ku ka marrë 17.8 për qind vota më shumë se në zgjedhjet e vitit 2014. Socialdemokratët, të cilët në nivel kombëtar qeverisin me demokristianët ( CDU), humbën rreth 7.7 për qind të mbështetjes në Saksoni. Mbështetja për AfD- në është rritur që kur kjo parti ka nisur fushatën kundër vendimit të Merkelit për të pranuar mbi një milion emigrantë në Gjermani, në vitin 2015. Koalicioni kombëtar midis demokristianëve dhe socialdemokratëve pritet të zgjasë deri në zgjedhjet federale më 2021. Merkel planifikon të tërhiqet nga politika atë vit. Në dhjetor të vitit të kaluar, ajo dha dorëheqjen nga drejtimi i partisë së saj, CDU.