“SHTETIN NUK E NDAJMË, AS NUK E BASHKOJMË”
Kandidatja për Kryeministre nga Lidhja Demokratike e Kosovës, Vjosa Osmani, tha se “Shtetin e Kosovës nuk e korrigjojmë, as nuk e ndajmë, as nuk e bashkojmë, as nuk e zhbëjmë, sepse Kosova është projekt i përhershëm dhe jo i përkohshëm”. Deklarata e saj tregon qartë qëndrimin që do të mbajë LDK në rastin kur qeveria e Kosovës mund të drejtohet prej saj pas zgjedhjeve të tetorit, nëse kthehet në tryezë ideja e korrigjimit të kufijve apo këmbimit të territoreve. het se ka presione të mëdha që një marrëveshje përfundimtare Kosovë- Serbi të arrihet deri në verën e vitit 2020, me dialogun e parashikuar për të rinisur në muajin dhjetor të këtij viti. Për arritjen e kësaj marrëveshjeje, janë ngritur dyshime se mund të rikthehet në tavolinë ideja për shkëmbim të territoreve dhe korrigjimit të kufijve, e kundërshtuar nga shumica e vendeve europiane, kryesisht Gjermania. Një deputet gjerman i koalicionit CDU- CSU, që drejtohet nga Kancelarja Angela Merkel, u takua të hënën në Beograd me Presidentin e Serbisë, Aleksandar Vuçiç, me të cilin kanë diskutuar rreth dialogut për normalizimin e raporteve Kosovë- Serbi. Vuçiç ka thënë se është i përkushtuar për normalizimin e raporteve me Prishtinën, në mënyrë që të arrihet një zgjidhje kompromisi që do të jetë e pranueshme për të dy palët. “Nëse arrihet një marrëveshje, ne presim që ajo të ketë mbështetjen e Gjermanisë, Bashkimit Europian dhe të gjithë komunitetit ndërkombëtar”, tha ai. Përfaqësuesi i Qeverisë gjermane, Peter Beyer, ka thënë se interesi i Gjermanisë është që rajoni të jetë i qëndrueshëm nga ana sociale dhe ekonomike. Vizita e Beyer në Serbi vjen pak ditë pas kthimit të Aleksander Vuçiçit nga Uashingtoni, ku u takua me Sekretarin Pompeo. Beyer pritet që brenda dy ditësh të vizitojë edhe Kosovën.