Prezantohet drejtori i ri, Pirro Misha: Bibliotekës i kanë rënë në qafë
"Në fillim hezitova, jam marrë gjithë jetën me librin, po s'kam qenë bibliotekas, biseda me ministren më bindi"
"Është njeriu i duhur, në kohën e duhur", me këto fjalë ish- drejtorja e Bibliotekës Kombëtare, Persida Asllani, vlerësoi Pirro Mishën gjatë prezantimit të tij zyrtar në krye të këtij institucioni, një muaj pas dorëheqjes së saj.
Studiuesi vjen në këtë post me një vizion të ri për Bibliotekën. Rikthimi i "dinjitetit" të këtij institucioni, pasurimi i koleksionit, janë primare për të. Misha i njeh vështirësitë që Biblioteka ka kaluar ( pas zjarrit dhe përmbytjes nga shiu), si dhe gjendjen aktuale të godinës, çka kërkojnë përgjegjësi. "Hezitova gjatë për këtë post, sepse për të fundit herë në shtet kam punuar në ' 93shin, pikërisht në Ministri të Kulturës. Është e vështirë të rikthehesh kur mësohesh të jesh i pavarur. Mandej kam punuar në cilësinë e këshilltarit, por asnjëherë nuk kam qenë rrogëtar i shtetit", tregon studiuesi. Ajo çka e ka nxitur të pranojë këtë detyrë, ka qenë dëshira e një njeriu që vë librin në plan të parë, për t'i kthyer prestigjin e munguar këtij institucioni. Publicisti nuk kursen as kritikat për situatën aktuale të objektit, që qëndron në hijen e institucioneve të tjera fqinje. "Do mundohem t'i rikthej prestigjin që ka patur dikur. Për mendimin tim, është një institucion, që i është rënë në qafë. Sapo shkel, e kupton që edhe hyrja është depresive. Biblioteka Kombëtare shkruhet me të vogla, ndërkohë që më lart një institucion tjetër shkruhet me të mëdha dhe është i ndriçuar. Këtu është errësirë. Dera e Bibliotekës është ende me duralumin, çka nuk haset më në asnjë institucion tjetër. Ndoshta do të gjendet një rrugë, që para se të bëhet Biblioteka e re, kjo të ndryshojë. Bibliotekat Kombëtare janë institucione ikonike për çdo vend, ndërsa këtu ideja ka qenë që të merren copa e t'u jepen ambasadave apo sektorëve të tjerë", tha drejtori i ri i BKsë gjatë prezantimit. Misha ndali edhe te rëndësia e këtij institucioni mëmë të librit, të krijuar nga Mit'hat Frashëri. Ai shtoi se do të bëjë përpjekje për plotësimin e koleksionit dhe çdo dokument apo libër që lidhet me Shqipërinë, nuk do t'i mungojë Bibliotekës. "Edhe në kohën e komunizmit, ishte detyrë e shtetit që BK të blinte çdo gjë. Janë kohëra që mungojnë. Kjo nuk është vetëm çështje financiare, pasi nevojitet edhe bashkëpunimi. Nuk ka asnjë justifikim që të mungojnë librat e rinj që botohen, për brezat e ardhshëm", tha drejtori i ri i Bibliotekës.
MARGARITI: PIRRO ME NJË VIZION TË RI
Ministria e Kulturës, Elva Margariti, vlerësoi gjatë fjalës së saj bashkëpunimin e vazhdueshëm me stafin e BK- së. Ajo vuri theksin te rëndësia e veçantë e këtij institucioni të kulturës. "Biblioteka Kombëtare mbart jo vetëm vlera institucionale e kulturore, por edhe shpirtërore. Është një institucion që mbart një vlerë simbolike për vendin". Margariti solli në kujtesë vështirësitë e kaluara, çka sipas saj shton më shumë përgjegjësinë, por edhe pritshmëritë për këtë institucion. Ajo vlerësoi punën e bërë nga ish- drejtorja, Persida Asllani, njëherazi dhe këmbënguljen e saj për të vijuar detyrën, pavarësisht presionit, në një kohë që në situatat e kaluara, shumëkush mund të kishte zgjedhur të hiqte dorë. "Me zonjën Asllani nisëm një komunikim shumë të mirë. Hartuam ide lidhur me strukturën e një biblioteke të re. E kam thënë se ky do të jetë një proces i gjatë, por mbetet një nga angazhimet kryesore të qeverisë. Vlerësoj mundin, mënyrën se si Asllani përballoi situatat e vështira. Në të tilla rrethana do të kishte qenë e lehtë që të largohej, ndaj qëndrimi i saj është për t'u vlerësuar. Jam e gëzuar që kësaj sfide i bashkohet një figurë tjetër, me të cilin do të plotësojmë hapat për të çuar projektin përpara. Është bërë një punë e mirë, çdo titullar i ri, sjell një vizion të ri dhe kjo është pozitive për të gjithë", u shpreh Margariti.
ASLLANI: PIRRO, NJERIU I DUHUR PËR BIBLIOTEKËN
Ish- drejtorja e Bibliotekës Kombëtare, studiuesja Persida Asllani, edhe pse ka dhënë dorëheqjen prej një muaji( pas 5 vitesh në këtë detyrë), siç Misha rrëfeu, vijon të bashkëpunojë intensivisht që pasardhësi i saj në këtë detyrë të njihet sa më mirë me situatën dhe problematikat. Gjatë prezantimit zyrtar të studiuesit, ajo vlerësoi Mishën si një figurë intelektuale që ka punuar gjithë jetën me librin, krahas vlerave të tjera profesionale dhe morale, që e bëjnë atë njeriun e duhur për të drejtuar këtë institucion. "Është një moment i mirë për të gjithë. Një energji e re. Pirro është një intelektual me emër. Një njeri që e do librin e kujdeset për të si për një fëmijë. Përkthyes, po ashtu, me një përvojë të gjatë në editim. Këshilltar i vazhdueshëm në jetën kulturore të vendit, si dhe studiues e vëzhgues i hollë i arritjeve albanologjike dhe i jetës kulturore evropiane e mbarë botërore. Këto e bëjnë Pirro Mishën njeriun e duhur, në kohën e duhur. Kam shquar shqetësimin, vetëdijen, kuriozitetin dhe afektin në sytë e Pirros për bibliotekën, që në emërim në krye të saj", tha Asllani. Studiuesja u shpreh se Biblioteka është një nga institucionet më të hershme të kulturës dhe mbart një peshë të jashtëzakonshme.
"Me zonjën Asllani nisëm një komunikim shumë të mirë. Hartuam ide lidhur me strukturën e një biblioteke të re. E kam thënë se ky do të jetë një proces i gjatë, por mbetet një nga angazhimet kryesore të qeverisë