"Divorc" final me Interin, Vanda çon Ikardin në Paris

Më në fund është vendosur fjala "fund" në "telenovelën" e merkatos. Mauro Ikardi është një lojtar i ri i Paris Shën Zhermenit: negociatat e transferimit u nisën natën e së dielës dhe përfunduan vetëm në orët e vona të ditës së djeshme. Sulmuesi argjentinas pranoi transferimin në Paris me formulën e huazimit: gjatë pasdites fluturoi nga Milano drejt kryeqytetit të Francës, ku kreu vizitat mjekësore dhe firmosi kontratën e re. Klubit zikaltër iu paguan 5 milionë euro për huazimin, ndërsa në fund të sezonit, PSG- ja për ta blerë do duhet të paguajë edhe 65 milionë.

RINOVIM - Ish- kapiteni largohet nga Interi pas muajsh të tërë polemikash dhe ballafaqimesh me drejtuesit. Do tentojë të ringrihet në Ligën 1, te kampionët në fuqi, ku për momentin janë të angazhuar me dëmtimet e Edinson Kavanit dhe Kilië Mbapesë. Një zgjidhje që ka kënaqur të dyja palët: nga Mauro që i bashkohet një skuadre elitare dhe do fitojë më shumë ( 7,5 milionë në sezon kundrejt 4,5), te zikaltrit që e lënë përkohësisht të lirë pa humbur kontrollin total të kartonit. Sepse përpara akordit me parisianët, 26- vjeçari zgjati akordin me një tjetër vit, pra deri në 2022- shin, në mënyrë që, nëse rikthehet në "Appiano" sërish, nuk do t'i skadonte kontrata pas vetëm 12 muajsh.

NUK KA GJYQ - Lufta ligjore mes Ikardit dhe Interin, në këtë mënyrë, nuk do të ketë vijimësi. Lojtari i kërkoi Kolegjit Arbitrar, përmes një fashikulli prej rreth 15 faqesh, rikthimin e menjëhershëm në pjesën taktike të stërvitjeve, nga ku është përjashtuar që prej ditës së grumbullimit në Lugano, plus një dëmshpërblim prej 1,5 milionë eurosh, 20% të pagës. Apeli do të hidhej poshtë në rast se Mauro do të largohej nga zikaltrit. Nëse do të qëndronte, klubi do të ishte i detyruar ta aktivizojë së paku në 10% të ndeshjeve zyrtare për të evituar rreziqe, sipas artikullit 15 të rregullores së FIFA- s, përndryshe Ikardi do të lirohej me parametër zero.