Komisioni e thërret dëshmitar për shkarkimin, Meta: 13 tetori është e vetmja zgjidhje
Kreu i shtetit: Propaganda anti- President nuk ndihmon sundimin e ligjit si kusht për çeljen e negociatave në 18 tetor
Komisioni hetimor që ka si objekt pune verifikimin e procedurës së ndjekur nga kreu i shtetit për zhdekretimin e datës së zgjedhjeve lokale ( 30 qershor), nisi zyrtarisht hetimin ndaj kreut të shtetit, Ilir Meta.
Komisioni zhvilloi dje mbledhjen e parë të këtij sesioni të ri parlamentar, ku miratoi edhe me votat e deputetëve të opozitës Projektplanin e Hetimit. Hapi i parë që do të hedhë komisioni është thirrja e Presidentit Meta për të dëshmuar në komision dhe data më e mundshme që po diskutohet për të zhvilluar seancën dëgjimore me presidencën është 9 shtator, pra, të hënën e ardhshme. Ndërkohë, nga Presidenca nuk përjashtohet që para deputetëve të shkojë vetë kreu i shtetit për t’iu përgjigjur pyetjeve të ligjvënësve në lidhje me dekretin e dytë, që anuloi zgjedhjet e 30 qershorit. Kreu i shtetit, Ilir Meta, doli menjëherë me një reagim postuar në rrjetet sociale, duke iu përgjigjur komisionit hetimor ndaj tij. “Propaganda anti- President nuk ndihmon sundimin e ligjit, që është kusht për çeljen e negociatave në 18 tetor nga Bashkimi Europian për vendin tonë. Spostimi i vëmendjes për momentin nga detyrimi për respektimin e dekretit në fuqi të 13 tetorit për zgjedhje gjithëpërfshirëse vendore, nuk ndihmon për zgjidhjen e krizës, por ndihmon përshkallëzimin e saj. Kriteret e Kopenhagenit nuk janë shfuqizuar ende nga BEja, ndaj respektimi i tyre është i pashmangshëm nëse ka mbetur sadopak vullnet politik për çeljen e negociatave më 18 tetor. Zgjedhjet janë e vetmja zgjidhje!”, shkruan Presidenti në reagimin e tij. Programi Pas dëgjesës me kreun e shtetit, komisioni hetimor do të marrë në shqyrtim të dhënat e raporteve të marra nga institucionet që lidhen me objektin e hetimit. Pasi të përfundojnë të gjitha procedurat sipas planit të veprimit, komisioni do t’i kushtojë një vëmendje të veçantë opinionit të ekspertëve të Komisionit të Venecias, të cilët mbërrijnë në Shqipëri në datat 9- 11 shtator, për të përgatitur raportin përfundimtar që i çohet Parlamentit. Por, në kushtet që Shqipëria nuk ka ende funksionale Gjykatën Kushtetuese, nënkryetari i komisionit të hetimit, Alban Zeneli, ka kërkuar shtyrjen e afatit të komisionit, i cili përfundon punën e tij më 9 tetor. “Për të qenë korrekt me opinionin publik, ne dhe të gjithë qytetarët janë dakord që të hetohet çdo person publik. Rasti i këtij komisioni është i pari në Shqipëri që ndodh. Por ka edhe një specifikë të veçantë, që çdo raport që del është i detyrueshëm të shkojë në Parlament dhe po ashtu çdo vendim që merr Parlamenti duhet të shkojë në Gjykatën Kushtetuese. Në jemi në kushtet që Gjykata Kushtetuese nuk është ende funksionale. Për shkak të kësaj dhe për shkak se ne u kemi kërkuar ekspertëve të Venecias një opinion paraprak dhe final, unë do t’i kërkoja këtij komisioni të nderuar, që pa u formuar Gjykata Kushtetuese dhe përpara se të merret edhe opinioni paraprak dhe ai final i Venecias, ne duhet ta shtyjmë afatin kohor të komisionit dhe të hetojmë paralel”, u shpreh nënkryetari i komisionit, Alban Zeneli. Kjo kërkesë nuk është aprovuar nga anëtarët e maxhorancës. “Ngritja dhe bërja funksionale e Gjykatës Kushtetuese nuk e pengon komisionin që të vijojë punën dhe të përfundojë këtë detyrë që i ka caktuar Kuvendi. Por ky komision duhet të presë patjetër opinionin e ekspertëve të Komisionit të Venecias për të arritur në një konkluzion përfundimtar në lidhje me objektin e tij”, u shpreh kryetari i komisionit, Ulsi Manja.